啟示錄 8 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

第七隻印仔

1羔羊掀開第七隻印仔个時，天頂恬恬無聲，差毋多半點鐘。

2然後，𠊎看到企在上帝面前个七個天使；有七支號筒交給佢等。

3另外有一個天使出來，拿等金香爐，企在祭壇前。有盡多香交給佢，俾佢同眾聖徒个祈禱共下獻在寶座前个金壇頂。

4該兜香所發出个煙㧯眾聖徒个祈禱就對天使个手中升到上帝个面前。

5接等，天使拿等香爐，將香爐裝滿壇頂个火，㧒到地上去。跈等，就響雷公，有𠾐𠾐滾个聲，𥍉爧，㧯地動。

號筒

6然後，該七個拿等七支號筒个天使就準備愛歕號筒。

7第一個天使一歕號筒，就有冰雹㧯火，摻等血，倒在地上。地个三分之一就燒掉，樹仔燒掉三分之一，所有个青草全部燒掉。

8第二個天使一歕號筒，就有一座像𤏸等火个大山㧒落海肚。海个三分之一變做血，

9海肚个生物死掉三分之一，船也壞掉三分之一。

10第三個天使一歕號筒，就有一粒大星仔，像𤏸等个火把，對天頂跌下來，落在三分之一个河壩㧯一切个水源頂高。

11(這粒星仔名安到「苦篤」。) 水个三分之一就變苦。因為水變苦，盡多人啉這個水就死掉。

12第四個天使一歕號筒，日頭个三分之一，月光个三分之一，㧯星仔个三分之一全部受到攻擊。恁樣，日頭、月光、㧯星仔就失掉三分之一个光；日時頭个三分之一無光，暗晡時也係恁樣。

13𠊎又看，又聽到一隻在空中飛盡高个鷹鳥大聲講：「慘了！慘了！住在地上个人慘了！因為另外三個天使就愛歕號筒了！」