詩篇 140 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

祈求保護 大衛个詩，交給聖歌隊長。

1上主啊，求你救𠊎脫離壞人；

保守𠊎，莫被兇惡个人陷害。

2佢等一心圖謀壞事；

佢等逐日惹起紛爭。

3佢等个舌乸像毒蛇，

滿嘴飯匙銃个毒氣。

4上主啊，救𠊎脫離壞人个權勢；

保守𠊎，莫被兇惡个人陷害；

佢等圖謀愛害𠊎跌倒。

5該兜驕傲个人設機關愛害𠊎；

佢等用索仔設落仔，

歸路裝羅網愛捉𠊎。

6𠊎對上主講：「你係𠊎个上帝！」

上主啊，求你側耳聽𠊎懇求个聲！

7至高个上主、𠊎大能个拯救者啊，

當相㓾該日，你有保護𠊎个頭那。

8上主啊，莫俾壞人个心願實現；

求你莫俾佢等个陰謀成功，

免得佢等自高自大。

9求你使圍困𠊎个人頭眩腦揙，

使佢等个咒詛臨到自家身上。

10願𤏸當猛个火炭落在佢等身上；

願佢等陷落深坑，永遠跋毋起來。

11願譭謗人个在世間企毋住；

願兇惡个人被災難打橫掉。

12上主啊，𠊎知你愛為弱小个人主持公道；

你定著會為窮苦人伸張正義。

13義人一定會頌讚你个名；

正直个人會住在你面前。