約伯記 37 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1因為恁樣，𠊎个心搏搏跳，

強強會跳離開它个原位。

2聽啊，你等全部愛聽上帝个聲，

聽佢嘴肚所發出𠾐𠾐滾个聲。

3佢差𥍉爧穿過天空，

對天這片𥍉到該片。

4隨後，人聽到佢𠾐𠾐滾个聲 —

雷公威嚴个響聲，

同時𥍉爧也緊𥍉無停。

5上帝發出奇妙个雷聲；

佢做个大事，𠊎等無法理解。

6佢命令雪落在地上，

也使大水落到無停。

7佢停止人个工作，

使人知佢个所做。

8野獸走入窿底背，

囥在牠兜个孔肚。

9風差對南方出，

寒流對北方來。

10上帝歕氣，水就結凍，

一大片个水就結做冰。

11佢使雲充滿水氣，

使𥍉爧對雲發出。

12它兜跈等上帝个指揮遊行轉動，

在全世界遵行上帝一切个命令。

13上帝落水滋潤地面，

顯明佢對人个慈愛；

佢也落大水責罰人。

14 約伯啊，注意聽噢！

請安靜一下仔，思考上帝奇妙个所做。

15你敢知上帝樣般下命令，

樣般使𥍉爧對雲中發射？

16你敢知滿有智慧上帝奇妙个所做，

樣般使雲浮在天空中嗎？

17你敢知南風吹來，大地就燒暖，

這時你著个幾領衫會熱起來？

18你會協助上帝鋪開穹蒼，

使它就像銅鏡恁硬係麼？

19請你教𠊎等㧯上帝愛講麼介；

𠊎等戇戇檔檔，毋知愛樣般講。

20𠊎毋敢要求㧯上帝講話；

敢有人想愛自家尋死路？

21事實上，風一吹，雲就散，

天頂光到非常恁刺目；

無人能昂頭去看該光。

22北方有金色个大光出現；

上帝个威嚴使𠊎等敬畏。

23全能者大有能力，𠊎等無法度接近；

總係佢有公義㧯正直，毋會欺負人。

24因為恁樣，大家攏總敬畏佢；

總係佢毋搭自作聰明个人 。