1-2上主吩咐耶利米下到猶大王宮，去㧯大衛王朝个君王、佢个官員、並對耶路撒冷各城門出入个人民講，上主恁樣講：
3「𠊎 — 上主命令你等執行公正个審判，伸張正義，對欺負人个手中解救被人壓迫个。你等做毋得壞款待抑係壓迫外族人、孤兒㧯寡婦；也做毋得在這所在流無罪个人个血。
4若係你等遵守𠊎个命令，大衛个後代就會繼續做王。佢等㧯佢等个官員、還有人民，全部做得坐戰車、騎馬，經過這兜城門，入到王宮。
5若係你等毋服從𠊎个命令，𠊎指等𠊎自家个名發誓，這王宮會變做荒埔。𠊎 — 上主恁樣宣佈了。
6「在𠊎看來，猶大王室个王宮像基列，又像黎巴嫩山頂恁靚；總係𠊎愛使它變做曠野、無人住个城市。
7𠊎愛派人毀滅它。佢等全部會帶斧頭來，斬斷該兜盡靚个香柏樹柱仔，㧒落火竇肚去。
8「後來，盡多外國人會經過這所在，大家會問，上主做麼介恁樣對付這座大城？
9然後佢等又自家應講：因為這座城个人違背上主 — 佢等个上帝㧯佢等立个約，去服事拜別个神。」
有關約哈斯10 猶大人民啊，毋好為死掉个王噭；
毋好為到約西亞王悲傷。
愛為佢个孻仔約哈斯來噭；
佢被人捉走，永遠毋會轉來，
毋會再看到自家个故鄉了。
11有關承接厥爸約西亞做猶大王个約哈斯
，上主恁樣講：「佢被人捉走、離開這所在，永遠毋會轉來。12佢會死在被人捉去个所在，毋會再看到這個地方了。」
有關約雅敬13慘了，這儕人有災禍了！
佢用不義个手段為自家起王宮，
用無公正个方法起當多樓房；
佢強迫人民做白工，
毋付工錢。
14慘了，這儕人有災禍了！
佢講：「𠊎愛起盡偉大个王宮，
起盡闊个樓房。」
佢開當大个窗門，
用香柏樹做天花板，
漆大紅个油漆。
15敢講你起比別人較高貴个香柏樹王宮，
就表示你係一位賢明个君王係麼？
若爸一生人享福、又食又啉。
佢做人做事照公平公義來行；
佢所做个全部順利。
16佢為窮苦無人幫助个伸冤；
佢所做个一切順利。
這係表示佢認識上主。
17總係你當貪心，單單顧自家个利益；
你流無罪个人个血，
用暴力壓制人民。
𠊎 — 上主恁樣宣佈了。
18所以，有關約西亞个孻仔猶大王約雅敬，上主恁樣講：
無人會為佢哀傷講：
「唉哉，𠊎个兄弟姊妹啊，還慘噢！」
無人會為佢傷心噭講：
「𠊎个主！𠊎个王啊！」
19佢會被人拖走，
被人㧒到耶路撒冷城外，
就像埋葬一隻驢仔。
有關耶路撒冷人民个命運20 耶路撒冷个人民啊，
上到黎巴嫩山頂去喊！
到巴珊去大聲噭！
對摩押个山頂喊！
因為你等个同盟國全部被人打輸囉。
21你等繁榮个時上主警告你等，
總係你等講：「𠊎等無愛聽！」
你等從細就毋聽講；
自從毋識正經服從上主。
22你等个領袖會被狂風捲走；
你等个同盟國會被人捉走；
你等全部會堵到見笑，被人侮辱；
因為你等做恁多个壞事。
23你等住在用黎巴嫩香柏樹起个王宮，
你等自家恅到當安全，
總係大難臨到該時，
你等係樣般可憐啊！
你等會像𫱔細人仔个婦人家恁樣大聲緊噌。
上帝審判約雅斤24上主對猶大王約雅敬个孻仔約雅斤
講：「𠊎 — 永生个上帝發誓：就算你係𠊎正手所戴印仔用个禁指，𠊎也愛將你剝掉，25交給你所驚、愛收若命个人。𠊎愛將你交給巴比倫王尼布甲尼撒㧯佢个軍隊。
26𠊎愛將你㧯若姆逐到外國去，到該毋係你等出世个所在去；你等會死在該位。
27你等盡想愛轉來，總係永遠無辦法轉來。」
28有人講：「約雅斤王敢毋係像一隻無人愛个爛罌仔？若毋係，做麼介佢㧯佢个子女全部被人㧒掉，逐到外邦去呢？」
29大地啊！大地啊！大地啊！
愛聽上主个話。
30上主恁樣講：
愛將這人登記做無子女，
佢一生人無半點成就！
佢毋會有後代好承接大衛个王位；
無一個會做王統治猶大。
Who We AreWhat We EelieveWhat We Do
2025 by iamachristian.org,Inc All rights reserved.
