1有一擺，好多稅棍㧯壞人來聽耶穌講道。
2法利賽人㧯經學教師發怨言講：「這個人樣會接待壞人，又同佢等共下食飯！」
3因為恁樣，耶穌講一個比喻給佢等聽；佢講：
4「若係你等中間某人有一百隻羊，失落其中一隻，佢敢毋會將其他个九十九隻放在草埔，去尋該隻失落个，直到尋到嗎？
5尋到以後，佢盡歡喜，就將羊仔放在肩頭頂，
6轉屋下去，然後請朋友㧯鄰舍來，對佢等講：『𠊎還歡喜噢！𠊎失落个羊仔尋到了！你等來同𠊎𢯭歡喜！』
7像恁樣，𠊎㧯你等講，一個罪人悔改，在天頂也愛為到佢歡喜；該種个歡喜，贏過九十九個毋使悔改个義人！
失落个錢8「若係一個婦人家有十隻銀錢 ，失落一隻，姖敢毋會點燈來拚屋，逐所在詳細尋，直到尋到嗎？
9尋到以後，姖就會請朋友㧯鄰舍來，對姖等講：『𠊎還歡喜噢！𠊎失落个銀錢尋到了！你等來同𠊎𢯭歡喜！』
10像恁樣，𠊎㧯你等講，上帝个天使也愛為到一個罪人个悔改來歡喜。」
慈父㧯浪子11耶穌繼續講：「某人有兩個孻仔。
12細个孻仔對阿爸講：『阿爸，求你這下就將𠊎應得个產業分給𠊎。』阿爸就將產業分給佢兩個孻仔。
13過幾日，細个孻仔就將所分到个產業賣掉，帶等錢離開屋下。佢去到盡遠个地方，在該位浪費錢財，過放蕩个生活。
14佢將所有个一切花淨淨後，又堵到該位大飢荒，佢就苦到講毋得。
15所以，佢去求當地一個人給佢事做；該人喊佢去農場畜豬仔。
16佢餓到連豬仔食个豆筴也想愛拿來食；還係無人拿麼介東西給佢食。
17最後，佢分醒過來，講：『吾爸有請恁多工人，佢等糧食充足又有賸，𠊎反轉在這位餓死！
18𠊎愛䟘起來，轉去吾爸該位，對佢講：阿爸，𠊎得罪天，也得罪你。
19𠊎已經無資格稱做若孻仔；求你看𠊎做你請來个工人。』
20佢就起身轉厥爸該位去。
「離屋下還盡遠，厥爸看到佢，就憐憫佢，走等過去，揇等佢个頸筋，緊唚佢。
21孻仔講：『阿爸，𠊎得罪天，也得罪你；已經無資格做若孻仔！』
22總係該阿爸喊僕人講：『遽遽拿最好个長袍來給佢著，拿禁指給佢戴，拿鞋給佢著，
23然後將該隻肥个細牛牯牽來㓾。𠊎等來辦桌，歡歡喜喜來慶祝！
24因為𠊎這個孻仔係死掉又復活、失落又尋到个。』大家就開始慶祝。
25「該時，大个孻仔還在田項做事；到佢轉來，離屋下無幾遠个時，聽到音樂㧯跳舞个聲，
26就喊一個僕人過來，問佢發生麼介事情。
27僕人應講：『若老弟轉來了！若爸因為佢平安勇健轉來，就㓾該隻肥个細牛牯。』
28「無想到，大孻仔卻發譴，毋肯入去；厥爸就出來勸佢。
29總係佢對厥爸講：『你看，恁多年來，𠊎像奴才恁樣服事你，毋識違背你个命令，你識給𠊎麼介哪？連一隻細山羊也毋識給𠊎同朋友共下歡喜。
30總係你這隻孻仔，佢將你个財產亂用在妓女个身上；這下佢轉來，你就為佢㓾該隻肥个細牛牯！』
31厥爸就對佢講：『細子啊，你常常同𠊎共下，𠊎一切所有个，全係你个。
32總係你這個老弟係死掉又復活、失落又尋到个；所以，𠊎等應當歡喜慶祝。』」
Who We AreWhat We EelieveWhat We Do
2025 by iamachristian.org,Inc All rights reserved.
