1上主留兜民族在這垤土地，愛考驗該兜無經驗過迦南戰爭个以色列人。
2佢个目的係愛教以色列人个後代相㓾，特別係從來毋識上戰場个人。
3留下个有非利士五座城个領袖㧯所有迦南人、西頓人，㧯住在巴力‧黑門山到哈馬隘口中間黎巴嫩山區个希未人。
4上主留下這兜民族係愛考驗以色列人，看佢等係毋係服從上主通過摩西頒佈給佢等祖先个誡命。
5所以以色列人住在迦南人、赫人、亞摩利人、比利洗人、希未人，㧯耶布斯人當中，
6討佢等个妹仔做𡜵娘，將自家个妹仔嫁給佢等个孻仔，又拜佢等个神明。
俄陀聶7 以色列人民行上主看做邪惡个事，毋記得上主 — 佢等个上帝，去拜該兜巴力㧯亞舍拉。
8所以上主向以色列人發譴，將佢等交在美索不達米亞王古珊‧利薩田个手中。以色列人服事佢八年。
9後來佢等求喊上主，上主就興起一個拯救者來解救佢等。這個人就係俄陀聶；佢係迦勒个老弟基納斯个孻仔。
10上主个靈降在佢身上，佢就做以色列人民个士師。俄陀聶出去相㓾；上主將美索不達米亞王古珊‧利薩田交在佢手中，俾佢打贏。
11所以這地方太平四十年，直到俄陀聶過身。
以笏12 以色列人民又行上主看做邪惡个事。所以，上主使摩押王伊磯倫比以色列較強，來攻擊以色列人。
13伊磯倫聯合亞捫人㧯亞瑪力人，來打贏以色列人，佔領棕樹城耶利哥。
14以色列人服事摩押王伊磯倫十八年。
15後來以色列人求喊上主，上主就為佢等興起一個拯救者。這個人就係以笏；佢係便雅憫人基拉个孻仔，習慣用左手。以色列人派以笏送禮物給摩押王伊磯倫。
16以笏打一支兩邊利个劍，半公尺長，將它䌈在右腳髀，囥在長衫底下，
17然後帶等禮物去見摩押王伊磯倫；伊磯倫係一個大箍牯。
18以笏獻禮物給佢以後，喊扛禮物个人全部轉去。
19佢自家在吉甲附近刻石頭个所在轉到伊磯倫該位，對佢講：「國王，𠊎有祕密愛㧯你講。」
所以王命令佢塍頭个人：「你等閃開！」佢等就全部退出去。
20該時，王單獨坐在屋頂坐涼个樓房底背；以笏行過去，對佢講：「𠊎有對上帝來个信息愛㧯你講。」王就企起來。
21以笏就用左手挷出囥在右腳髀个劍，刺入王个肚笥；
22將劍連柄全部刺入去，劍被皮肉夾到，連屎也洩出來 。以笏將劍留在王个肚笥，
23然後出去，將門全部關起來鎖好。
24佢離開該位以後，王个僕人來到，看到門全部鎖等，恅到王在底背屙屎。
25佢等緊等，等到無葛煞，王還係無開門，就拿鎖匙開門，發現佢等个主人已經橫在地上，死掉了。
26該兜僕人拖時間个時，以笏就逃走了。佢經過刻石頭个所在，走到西伊拉。
27到以法蓮山區个西伊拉以後，佢歕羊角召集以色列人準備相㓾。佢帶領以色列人下山，
28命令佢等講：「跈𠊎來！上主將你等个仇敵摩押人交在你等手中了。」佢等就跈以笏下山，佔領約旦河渡船頭，攔等摩押人，毋准敵人過河。
29該日，佢等㓾掉摩押精兵一萬人，連一個也無被佢走掉。
30該日，以色列人打贏摩押。所以這地方就太平八十年。
珊迦31 以笏以後，有亞拿个孻仔珊迦；佢用一支逐牛个竻棍打死六百個非利士人，也拯救以色列。
Who We AreWhat We EelieveWhat We Do
2025 by iamachristian.org,Inc All rights reserved.
