詩篇 86 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

求幫助个祈禱 大衛个祈禱。

1上主啊，求你側耳來聽𠊎，應𠊎，

因為𠊎窮苦，無人幫助。

2保護𠊎个性命，因為𠊎對你忠心；

𠊎个上帝啊，求你拯救這信靠你个僕人！

3主啊，求你憐憫𠊎，

因為𠊎歸日求喊你。

4主啊，求你使你个僕人歡喜，

因為𠊎个心所仰望个就係你。

5主啊，你係至善个，係樂意赦免人个；

求喊你个就會得到你豐盛个慈愛。

6上主啊，求你側耳聽𠊎个祈禱；

求你留心聽𠊎求喊个聲。

7在患難當中𠊎愛求喊你，

因為你會答應𠊎。

8主啊，無別个神同你比抑得；

佢等个作為同你个比毋得。

9主啊，你所造个萬國會來跪拜你；

佢等會榮耀你个尊名。

10因為你最偉大，又行奇事；

唯有你正係上帝。

11上主啊，求你將你个道路指示𠊎，

𠊎愛照你个真理來行；

求你使𠊎一心敬畏你。

12主 — 𠊎个上帝啊，𠊎愛全心感謝你；

𠊎愛榮光你个名直到永遠。

13你對𠊎个慈愛恁大；

你拯救𠊎脫離陰間。

14上帝啊，驕傲个人攻擊𠊎；

歸黨兇惡个暴徒想愛殺害𠊎，

佢等全無將你放在眼中。

15主啊，你係有憐憫㧯恩典个上帝；

你無隨便發譴，有豐盛个慈愛㧯信實。

16求你轉身面向𠊎，憐憫𠊎；

將你个力量賜給你个僕人，拯救𠊎，

因為𠊎像吾姆恁樣事奉你。

17上主啊，對𠊎顯出你个良善，

使恨𠊎个人看到憑據來見笑，

因為你確實幫助𠊎，安慰𠊎。