1上主啊，你有試驗𠊎，
你認識𠊎。
2𠊎个一舉一動，你全部知；
離開恁遠，你也知𠊎个心思。
3無論𠊎做事抑係休息，
你一直看顧𠊎；
𠊎一切所做个，你全部知。
4上主啊，𠊎吂講，
你就知𠊎个意思。
5你在𠊎四周圍保護𠊎；
你用你个權能保佑𠊎。
6你認識𠊎非常徹底，
超過𠊎所能理解个。
7𠊎愛去㖠位正閃得開你个靈？
𠊎愛走到㖠位正閃得開你个面？
8𠊎若係上到天頂，
你一定在該位；
𠊎若係下到陰間，
你也會在該位。
9𠊎就係飛到東片个天涯，
抑係住在西片个海角，
10你个手也一定會在該位帶領𠊎；
你个右手絕對會在該位扶持𠊎。
11𠊎若係講：「烏暗一定會遮等𠊎，
𠊎周圍个光明會變做烏暗」，
12總係對你來講，烏暗毋算烏暗，
暗晡頭㧯日時頭共樣恁光。
烏暗㧯光明對你來看係共樣个。
13𠊎个五臟六腑 係你造个；
在母胎中你使𠊎成形。
14𠊎頌讚你，因為𠊎个受造得人畏又神奇；
你个作為實在奇妙，
這係𠊎个心深知个！
15𠊎在母胎个底背恬恬成形，你也盡清楚；
像係在盡深个地底下製造个，也瞞你毋過。
16𠊎出世以前，你个目珠已經看到𠊎个形體；
人生吂開始，你就為𠊎打算，記在你个書項。
17上帝啊，你个意念實在深奧 ！
你个心思實在真難推算！
18𠊎若係算看仔，一定比海沙較多；
就係算到底、無清楚 ，𠊎還係㧯你同在。
19上帝啊，𠊎真希望你將壞人收掉！
𠊎盡希望你使兇惡个人離開𠊎！
20佢等講壞話惹你；
佢等開嘴褻瀆你。
21上主啊，𠊎樣般怨恨該兜怨恨你个人！
𠊎樣般惱該兜悖逆你个人！
22𠊎怨恨佢等到底，
將佢等看做仇敵。
23上帝啊，求你試驗𠊎，了解𠊎个心思；
考驗𠊎，明白𠊎个意念。
24看𠊎底背有麼介壞心思無；
求你帶領𠊎行永生个道路 。
Who We AreWhat We EelieveWhat We Do
2025 by iamachristian.org,Inc All rights reserved.
