1𠊎識㧯𠊎个目珠立約，
看細妹仔絕對做毋得帶邪念。
2至上个上帝為𠊎等所定个報應係麼介？
至高个全能者係樣般報答人个行為呢？
3佢敢毋係愛降災難給不義个人？
敢毋係愛使災禍臨到作惡个人？
4佢敢毋係查看𠊎所行个道路？
佢敢毋係點算𠊎一切个腳步？
5𠊎敢發誓，𠊎從來毋識作惡；
𠊎也毋識欺詐別人。
6願上帝用公當个天平來秤𠊎；
佢就會知𠊎正經無犯麼介罪。
7若係𠊎个腳偏離正路，
心被所看个惡吸引去，
手又被罪惡來打垃圾，
8就俾別人收割𠊎个出產，
俾別人享受𠊎種个產物。
9若係𠊎對鄰舍个𡜵娘有邪念，
埋伏在佢个門口等機會，
10就俾吾𡜵娘去㧯別人煮飯，
就俾別个男人㧯姖共下睡。
11這係嚴重个罪；
應當愛判死刑。
12這個罪會像毀滅个大火，
將𠊎所有个產物燒淨淨。
13𠊎个僕人對𠊎表示不滿个時，
𠊎就詳細聽，用公道對待佢等。
14若毋係恁樣，𠊎樣能面對上帝呢？
上帝審問𠊎个時，𠊎愛講麼介呢？
15創造𠊎个上帝敢毋係也創造佢等？
創造𠊎等个敢毋係共一個上帝呢？
16𠊎敢識毋肯救濟窮苦人麼？
𠊎敢識俾寡婦失望過係麼？
17𠊎敢識自家食到飽飽，
總係由在孤兒餓肚笥？
18𠊎長透照顧孤兒，像係厥爸；
𠊎一生人常扶持幫助寡婦。
19𠊎若堵到人無衫著、冷到會死，
𠊎若看到窮苦人無衫褲好著，
20𠊎就拿自家出產个羊毛衫給佢等著燒。
佢等攏總誠心感謝𠊎。
21若係𠊎在法院有朋友，
就靠勢力去欺負孤兒，
22願𠊎个肩頭𢫫腕，
願𠊎个手骨斷掉。
23因為𠊎當驚上帝个責罰，
因佢个威嚴，𠊎毋敢亂來！
24𠊎從來毋識倚靠金錢，
也絕對毋會信賴黃金。
25𠊎毋識因為錢財驕傲，
也毋會因為富足歡喜。
26𠊎毋識因為日頭恁光，
抑係因為月光恁明亮，
27就受引誘去歌頌它兜，
抑係唚手 來表示尊敬。
28恁樣做就係悖逆至高个上帝；
這係罪大惡極，應該愛判死刑。
29𠊎從來毋識看敵人受苦就快樂，
毋識看到佢等堵到災難就歡喜；
30毋准𠊎个嘴犯罪，
咒詛人「孤盲絕代」。
31所有在𠊎屋下做過長工个人，
毋識講𠊎無好好來接待佢等。
32𠊎請過路个旅客到吾屋下來，
從來毋識俾佢等在街項過夜。
33人常常愛將自家个過犯遮等；
總係𠊎無將自家个過失囥等。
34𠊎從來就毋驚親族外人講𠊎个閒話，
無因為驚人罵就毋敢講話，毋敢出門。
35敢講無人肯聽𠊎說明嗎！
𠊎發誓，𠊎个話逐句真實；
願全能个上帝肯回答𠊎！
願該告𠊎个寫出𠊎个罪，
將寫好个狀仔拿給𠊎看。
36𠊎愛將它貼在肩頭頂高，
抑係做冕旒戴在頭那頂。
37𠊎愛向上帝說明𠊎所做个一切，
像王子大大方方來到佢个面前。
38若係𠊎識霸佔別人个田地，
田地會大聲喊，犁溝也會噭；
39若係𠊎食田產無付錢，
抑係害耕種个人餓死，
40願該垤田生滿竻仔㧯野草，
小麥大麥全部毋會再出產。
約伯个話講煞了。
Who We AreWhat We EelieveWhat We Do
2025 by iamachristian.org,Inc All rights reserved.
