1越受責罰就越硬頸个人，
會即時敗壞，無法度好醫。
2正直人增加，人民歡喜快樂；
邪惡人執政，人民悲傷道嘆。
3愛慕智慧个，使阿爸歡喜；
結交妓女个，財產了淨淨。
4君王行事公義，國家就堅定；
若係貪污腐敗，國家就滅亡。
5凡係阿媚奉承鄰舍个，
就係設羅網絆佢 个腳。
6邪惡人犯罪，陷入羅網；
正直人唱歌，歡喜快樂。
7正直人尊重窮苦人个權利；
邪惡人就無恁樣个同情心。
8傲慢人在城肚製造混亂；
智慧人平息百姓个憤怒。
9智慧人控告戇人完全無效；
戇人毋係發譴就大笑大鬧。
10好㓾人个盡恨完全人，
乜想愛害正直人个命。
11戇檔人閼到就拚出來；
智慧人曉得控制脾氣。
12執政者若歡喜聽肨風个話，
佢个部下一定會變做奸臣。
13窮苦人㧯欺負人个在世間堵到，
上主使兩儕个目珠平平看得到。
14君王用公正判斷窮苦人，
佢个王位就會一直堅定。
15用竹修管教能加添智慧；
放蕩个子女使阿姆見笑。
16邪惡人緊多，罪惡緊增加；
正直人會看等佢等衰敗。
17愛管教你个孻仔，
佢就使你有平安，
也使你个心快樂。
18若無上帝个異象，人民就糮糝來；
遵守上帝教示个，實在有福氣噢！
19單單用講話，管教僕人無效；
雖然佢了解，還係無愛插你。
20你看到講話隨便个人麼？
戇檔人比佢還較有希望。
21人將僕人從細縱到大，
這僕人到尾就會霸佔佢个財產 。
22容易發譴个會惹起相爭，
盡遽發脾氣个多多犯罪。
23人个驕傲使佢降卑；
心存謙卑受人尊重。
24人㧯賊仔結黨，就係害自家；
佢在法庭發誓，毋敢講實話。
25人所驚个，會成做佢个陷阱；
信靠上主，佢就得安然自在。
26人人想求統治者个恩惠；
其實只有上主伸張正義。
27義人惱不義个人；
惡人恨正直个人。
Who We AreWhat We EelieveWhat We Do
2025 by iamachristian.org,Inc All rights reserved.
