羅馬書 15 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

毋好求滿足自家

1𠊎等有堅強信心个人應該幫助信心軟弱个人，分擔佢等个重擔，毋好求滿足自家。

2𠊎等逐儕愛為到其他信徒个利益設想，來建立共同个信心生活。

3因為基督並無求滿足自家，反轉像聖經所講：「該兜辱罵你个人所發出个辱罵全部落在𠊎个身上。」

4聖經个話攏總係為到教𠊎等來寫个，目的係愛𠊎等對聖經所教个忍耐㧯鼓勵來得到希望。

5願賜忍耐㧯鼓勵个上帝幫助你等，使你等通過學基督耶穌个榜樣，會有共樣个心意，

6使你等大家會同心齊聲頌讚𠊎等主耶穌基督个阿爸上帝。

對外邦人傳福音

7所以，你等愛彼此接納，像基督接納你等一樣，來榮光上帝。

8𠊎㧯你等講，基督為到愛顯明上帝个信實，識做過猶太人个僕人，使上帝對該兜族長个應許得到實現，

9同時，使外邦人也會頌讚上帝个憐憫。像聖經所講：

所以，𠊎愛在外邦人中頌讚你；

𠊎愛唱歌頌讚你个名。

10聖經又講：

外邦人啊，

愛同上帝个子民共下歡喜。

11又講：

所有个外邦人啊，愛頌讚主；

天下萬民啊，你等愛頌讚佢！

12 以賽亞也講：

會有耶西个後代出來，

佢愛興起來統治外邦；

外邦人攏總會仰望佢！

13願賜希望个上帝，因為你等對佢个信心，使你等充滿各種个歡喜㧯平安，通過聖靈个能力，使你等个希望一直增加。

保羅實話直講

14兄弟姊妹啊，𠊎本身深信你等自家滿有好德行，有豐富个智識，也會互相勸勉。

15總係，在這封信仔底背，有兜問題𠊎還係好膽提醒你等。𠊎恁樣實話直講，係因為上帝特別施恩給𠊎，

16使𠊎做基督耶穌个僕人，在外邦人个中間工作。𠊎像祭司一樣講論上帝个福音，係愛使外邦人通過聖靈个聖化，成做上帝歡喜接納个祭物。

17結果，𠊎因為在基督耶穌个名下對上帝个事奉卻有好誇口。

18𠊎敢大膽講个只有一樣：基督使外邦人歸順上帝，係通過𠊎个所講㧯所做，

19用神蹟奇事㧯上帝个靈个能力來完成个。恁樣，𠊎對耶路撒冷到以利哩古一帶，𠊎逐所在去傳基督个福音。

20𠊎決心去還吂聽過基督个地方傳福音，免得𠊎个工作建立在別人个基礎頂高。

21像聖經所講：

吂認識佢个人會看到；

吂聽過佢个人會明白。

保羅訪問羅馬个計劃

22𠊎好多擺愛去你等該位，總係堵到阻擋。

23這下，既然𠊎已經完成這一帶个工作，訪問你等又係𠊎多年來个心願，

24𠊎希望在去西班牙个時，順路去看你等，同你等歡喜聚集一站時間，然後正在你等个幫助之下繼續向前。

25總係這下，為到供給聖徒个事，𠊎一定愛先去耶路撒冷。

26因為馬其頓㧯亞該亞个教會有樂捐一筆錢，愛幫助耶路撒冷聖徒中个窮苦人。

27佢等盡歡喜恁樣行，其實也係佢等个義務：既然猶太人基督徒俾外邦人分享屬靈个恩賜，外邦人也應該用物質來幫助佢等。

28等𠊎辦好這件事，將佢等所捐个錢交帶清楚，𠊎就會經過你等該位，去西班牙。

29𠊎知，𠊎去探訪你等，一定會帶給你等基督豐盛个祝福。

30兄弟姊妹啊，靠𠊎等个主耶穌基督，通過聖靈所賜个愛心，𠊎求你等同𠊎共下迫切為𠊎懇求上帝：

31使𠊎毋會被在猶太該兜毋信个人害到，也使𠊎在耶路撒冷个救濟工作會得到聖徒个歡喜接納。

32上帝若肯，𠊎就會歡歡喜喜去看你等，在你等該位休息一站時間。

33願賜平安个上帝同你大家共下！阿愐。