1上主講：
𠊎个僕人雅各，
𠊎个選民以色列啊，
這下你愛聽！
2𠊎係創造你个上主，
對你一出世，𠊎就幫助你。
毋使驚！你係𠊎个僕人，
你係 𠊎所惜个選民。
3𠊎愛降雨給燥旱个土地，
愛使沙漠湧出泉水。
𠊎愛將𠊎个靈降給你个後代，
愛賜福給你个子孫。
4佢等會生長像水邊个青草，
茂盛像河壩滣个柳樹。
5有人講：「𠊎屬上主」；
也有人自稱係屬雅各个人民；
又有人在手項寫等：「歸給上主个」；
佢等攏總愛參加以色列个行列。
6上主 — 以色列个君王，
萬軍个元帥 — 救贖主恁樣講：
𠊎係開始，𠊎係結束；
𠊎以外無上帝。
7麼人㧯𠊎比抑得，佢做得出來講明！
麼人有辦法做𠊎做過个事？
麼人有法度預言將來个事？
佢做得將會發生个事講出來啊！
8𠊎个子民啊，毋好著驚！
𠊎毋係早就將古早个事全部預言過？
你等就係𠊎个證人。
𠊎以外，還有別个上帝麼？
無半個！實在無其他个磐石！
虛假个偶像9雕刻偶像个人全部係虛空、又打喪工；佢等所認為當有價值个偶像事實上無半些價值。拜該兜神明个人看毋到真相、麼介都毋知；佢等必定會堵到見笑。
10係麼人製造神像，鑄造無用个偶像？
11看啊，所有拜偶像个會堵到見笑；造偶像个也係人定定。就算佢等全部聚集企共下，佢等面對𠊎也全部會著驚、會見笑。
12打鐵个拿一垤鐵放在火肚燒，用強壯个手拿起鐵鎚，將鐵仔鎚成形。佢出力打，到肚飢無力，又無水啉就當𤸁當痶。
13做木匠个取樹料，用墨斗彈線，用鉋仔鉋平，用圓尺畫模型，刻做人个形像，又靚又像，愛放在廟肚。
14佢做得去斬香柏樹，抑係取樹林中个橡樹抑係檜木來用。佢也做得種松樹，等到落雨使它大頭起來。
15人可能將這樹个一部份做柴來燒，拿一部份起火來焙燒抑係焙餅，另外一部份刻做神明俾人拜。
16佢拿樹仔來燒，在該頂高焙肉，食到飽飽。佢也可能燒樹仔來焙火，講：「啊！有火盡好，盡燒暖！」
17最後，佢用賸到个一部份刻偶像來跪拜，祈禱講：「你係𠊎个神明，求你來救𠊎！」
18佢等實在無智識又毋曉得！佢等目珠揞等毋看，頭腦塞等毋想。
19只愛製造偶像个人頭腦挺動一下、想一下，就會講：「𠊎用共頭樹个樹料，一部份做柴來燒，焙餅，焙肉來食；另外一部份用來刻偶像，𠊎還愛跪拜這垤樹杚頭嗎？」
20這敢毋係像拿火灰充飢？佢个戇檔使佢行為偏差，無辦法救自家；佢毋承認手做个偶像係虛假个。
上主係創造主、救贖主21上主講：
雅各啊，愛記得這兜事；
以色列啊，你係𠊎个僕人。
𠊎造你，愛你做𠊎个僕人；
𠊎永遠毋會毋記得你。
22𠊎赦免你个過犯㧯罪惡，
使它兜像烏雲㧯濛煙散掉一樣；
你愛歸向𠊎，因為𠊎救贖你。
23天啊，愛歡呼！
地最深个所在啊，愛大聲唱！
群山啊，全部愛歡呼！
樹林㧯其中个樹仔啊，全部來唱歌！
上主已經救贖雅各；
佢已經通過以色列顯出榮光。
24上主 — 你个救贖者講，
對母胎創造你个上帝恁樣宣佈：
𠊎係上主，創造萬物个主宰。
𠊎自家展開天空；
𠊎親自鋪設大地。
25𠊎使卜卦个人癲狂，
使算命个判斷失效。
𠊎贏過聰明人，
指出佢等个「智慧」全部係戇檔。
26總係，𠊎个僕人講預言、
𠊎个使者計劃該時，
𠊎使該兜預言㧯計劃全部實現。
𠊎㧯耶路撒冷講，
還會有人在該位住；
𠊎㧯猶大講，
𠊎愛對荒涼中重建猶大个城市。
27𠊎命令海水燥掉；
𠊎命令河壩變做旱地。
28𠊎對波斯王塞魯士講：
你愛照顧𠊎个羊群，
執行𠊎个旨意。
你愛下令重建耶路撒冷；
你愛命令建立聖殿个基礎。
Who We AreWhat We EelieveWhat We Do
2025 by iamachristian.org,Inc All rights reserved.
