約拿書 2 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

約拿个祈禱

1 約拿在魚肚笥向上主 — 佢个上帝祈禱：

2上主啊，𠊎堵到災難个時求喊你，

你有答應𠊎。

𠊎對陰間肚向你懇求，

你聽𠊎个祈求。

3你將𠊎㧹落深海，

到深深个海底；

大水包圍𠊎，

你个大浪揜等𠊎。

4𠊎想，𠊎已經對你面前被你逐走，

總係𠊎還愛仰望你个聖殿 。

5大水揜等𠊎，害𠊎透氣毋出；

𠊎陷在大海盡深个所在；

海草纏住𠊎个頭那。

6𠊎下到眾山个腳下，

來到門閂永遠鎖等个陰間。

總係上主 — 𠊎个上帝啊，

你對陰間个底背將𠊎生生救出來。

7𠊎感覺自家个生命會無掉个時，

上主啊，𠊎就想念你；

𠊎个祈禱入到你个聖殿，

達到你个面前。

8該兜敬拜虛假偶像个，

佢等已經豁掉對你个誠心 。

9總係𠊎愛唱歌感謝你；

𠊎愛向你獻祭，

還一切所許个願。

拯救係對上主來！

10後來，上主命令該條大魚將約拿呸在沙灘，大魚就照恁樣做。