1後來，上主對大風當中回答約伯講：
2你係麼人，敢懷疑𠊎个旨意？
你樣會講恁無智識个話啊？
3企起來，像一個勇敢个人；
𠊎問你，你來指教𠊎。
4𠊎創造世界个時，你在㖠位？
你若係正經恁聰明，講看仔！
5你敢知係麼儕定它个大細？
麼儕在它个頂高拉線測量？
6大地个基礎 安在㖠位？
世界个基石麼儕放个？
7該日天光星共下唱歌；
天頂眾神子 大聲歡呼。
8大海 對地泥下爆出來个時，
麼儕關水門，俾它停下來呢？
9係𠊎用雲遮蓋大海，
將它包在大濛煙中。
10𠊎為海水定好界限，
並安水門又閂起來。
11𠊎㧯它講：你到這位就好，做毋得超過；
你兇狂个大浪一定愛在這位停下來。
12 約伯啊，朝晨頭个日光對㖠位出來？
你一生人當中敢識對它下過命令？
13你敢有辦法吩咐日頭照大地，
將囥在烏暗中个壞人逐出來？
14日頭緊照，地上个山岡山壢變形，
像鑿出來个模仔，像摺好个衫褲。
15大光一照，該兜壞人就毋敢亂來，
佢等擎起來个手毋敢攻擊人。
16你識落去過海底麼？
你識在深淵肚行麼？
17有人指示你死亡个門麼？
你敢識看過陰間个門麼？
18你知這世界有幾大麼？
若係你知就㧯𠊎講啊！
19你知光對㖠位來麼？
烏暗个源頭在㖠位？
20你會帶它兜轉原位去麼？
你知帶它兜轉去个路麼？
21這兜事你應當知，因為你恁老了；
世界受創造个時，你已經出世了！
22你敢識入去放雪个倉庫，
抑係看過冰雹个倉庫麼？
23𠊎囤這兜，
準備在降災難㧯戰爭个日仔來用。
24光係對㖠位散開來？
東風對㖠位吹過來？
25麼儕為大雨分水路？
麼儕為𥍉爧開路線？
26麼儕落水在無人住个所在？
在無人到个荒地？
27麼儕滋潤天旱个地，
使土地又生出青草？
28雨水有阿爸麼？
露水係麼儕𫱔个呢？
29麼儕係冰个阿姆？
天頂个霜係麼人𫱔个？
30麼儕使水變像石頭恁硬？
使海面結冰？
31你有辦法將昴星䌈共下麼？
你有辦法解開獵戶星个帶仔麼？
32你有辦法照時帶群星麼？
你會𢱋大細北斗星麼？
33你知天體運行个規則麼？
你會決定大地个法則麼？
34你有辦法使雲聽你發出个命令麼？
你會喊大雨像倒等下來个水麼？
35若係你向𥍉爧發出命令，
它會到你个面前應講：「𠊎在這位」麼？
36麼儕俾朱鷺鳥有智慧講尼羅河幾時會做大水？
麼儕賜聰明給雞公啼講會天光了？
37麼儕有智慧去算雲團有幾蕊？
麼儕有辦法使雲變雨倒等下來？
38麼儕有辦法使灰塵結矻？
麼儕有辦法使泥粉結團？
39-40獅仔在窿肚跍等，
抑係在草藪肚伏等；
你有辦法為獅乸捉到獵物麼？
你有辦法使細獅仔食飽麼？
41烏鴉餓到飛來飛去，
細烏鴉向𠊎求食物，
該時麼儕去餵飽牠兜呢？
Who We AreWhat We EelieveWhat We Do
2025 by iamachristian.org,Inc All rights reserved.
