詩篇 42 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

第二卷(詩篇 42–72 篇)流亡者个祈禱 (上) 可拉後代个教訓詩，交給聖歌隊長。

1上帝啊，𠊎係樣般个渴慕你，

就像鹿仔嘴燥想清涼个溪水一樣。

2𠊎切切想念上帝，就係永生个上帝；

𠊎幾時正做得到上帝面前朝拜佢呢？

3𠊎日夜傷心，用目汁準飯食；

有人一直問𠊎，講：

「你个上帝在㖠位？」

4想到頭擺个情形，𠊎有講毋出个傷心：

該時，𠊎同大家共下去上帝个聖殿，

帶領該兜朝聖个人，

歸路歡喜唱歌感謝上帝。

5𠊎个心啊，做麼介恁傷心？

做麼介噌無停？

愛仰望上帝，再一擺頌讚佢；

佢係𠊎个救主，𠊎个上帝。

6-7流亡到這位，𠊎个心破碎，所以𠊎想到上帝。

佢使煩躁像深淵中个大水聲；

憂愁像波浪會浸死𠊎。

𠊎个心情像對黑門山㧯米薩嶺沖到約旦河个瀑布一樣。

8願上主日時頭給𠊎享受佢不變个慈愛，

暗晡頭俾𠊎唱歌祈求賜𠊎生命个上帝。

9𠊎㧯上帝，𠊎个磐石講：

「你做麼介毋記得𠊎？

𠊎做麼介堵到仇敵个迫害，食恁多苦？」

10佢等侮辱𠊎像打碎𠊎个骨頭；

佢等問無停：

「你个上帝在㖠位？」

11𠊎个心啊，做麼介恁傷心？

做麼介噌無停？

愛仰望上帝，再一擺頌讚佢；

佢係𠊎个救主，𠊎个上帝。