1上主向先知耶利米講起有關列國个事。
2有關埃及：佢提到埃及王尼哥个軍隊，在猶大王約西亞个孻仔約雅敬做王个第四年，被巴比倫王尼布甲尼撒在幼發拉底河附近个迦基米施打輸。上主講：
3 埃及个軍官發命令：
準備大細盾牌！
向戰場前進！
4落馬鞍，騎戰馬！
就定位，戴鐵帽！
磨利槍，著鐵甲！
5總係上主問：
𠊎看到麼介呢？
佢等驚到打亂退；
佢等个戰士被人打輸，
盡命走、毋敢斡頭，
感覺四圍當得人驚！
6最會走个也走毋掣；
戰士全部走毋掉。
在北方，幼發拉底河壩滣，
佢等全部跌到貼貼。
7像尼羅河个水漲起來个係麼人呢？
像河壩發大水个係麼人呢？
8係埃及像尼羅河个水漲起來，
像河壩發大水。
埃及講：「𠊎愛漲起來，將全地浸掉；
𠊎愛毀滅城市㧯其中个人民。
9騎兵衝鋒，戰車進攻！
古實人㧯弗人帶等盾牌；
呂底亞人拿等弓箭。
這兜勇士全部出去相㓾！」
10總係，這係至高个上主 — 萬軍元帥个日仔：
今晡日，佢愛報仇；
今晡日，佢愛責罰敵人。
佢个寶劍愛食敵人个肉到飽，
啉敵人个血到足。
今晡日，至高个上主、萬軍个元帥
愛在北方个幼發拉底河壩滣，
將敵人當做牲儀。
11 埃及人啊，上基列
去！到該位去尋膏藥！
你所有个藥仔全部無效；
無辦法醫好你。
12列國聽到你个見笑；
全地充滿你个噭聲。
戰士㧯戰士相撞；
兩儕共下橫倒。
尼布甲尼撒來侵犯13 巴比倫王尼布甲尼撒愛去攻打埃及个時，上主對先知耶利米講：
14愛在埃及逐城市宣佈，
在密奪、孟斐斯、答比匿宣告講：
䟘起來，準備相㓾！
戰爭會吞滅你个一切。
15你等个大牛神亞比士做麼介會伏落去？
係上主將它㩳橫！
16你等个戰士撞來撞去、橫倒。
佢等大家講：
「䟘起來！轉老屋去！
轉到本族該位，
遠遠離開敵人个刀劍！」
17佢等㧯埃及王另外取一個名，
安到：「雞頦仙，佢个機會失掉去了。」
18𠊎个名係上主 — 萬軍个元帥，
𠊎係大君王。
𠊎指等𠊎个永生發誓：
尼布甲尼撒 來侵犯个大軍
會像高過群山个他泊山，
像企在海滣个迦密山。
19 埃及人啊，包袱愛捆好，準備逃命！
孟斐斯會被人燒掉、變做荒埔，全無人住。
20 埃及像一隻盡肥个牛乸，
被北方飛來个螰虻攻擊。
21姖請來个兵仔像牛欄肚肥肥个細牛牯，
攏總轉身逃走，
無一個敢企出來相㓾。
佢等堵到災難个日仔到了；
佢等受責罰个時節到了！
22 埃及逃走个聲，
像蛇哥逃走个聲。
敵軍來攻擊姖，
像倒樹个人用斧頭斬斷樹仔。
23 埃及雖然像茂盛个樹林，
總係會被敵人斬掉，
因為敵軍比草蜢還較多，多到算毋出。
24 埃及人會堵到羞辱；
佢等會被北方來个人佔領。
𠊎 — 上主恁樣宣佈了。
25上主 — 萬軍个元帥、以色列个上帝講：「𠊎愛責罰底比斯个神明亞捫、埃及王、㧯埃及全地，也愛責罰埃及所有个神明㧯該兜分封个王。
26𠊎愛將埃及王㧯所有投靠佢个人，全部交給想愛毀滅佢等性命个巴比倫王尼布甲尼撒㧯佢个軍隊。總係過一站時間，埃及會像頭擺共樣有人住。𠊎 — 上主恁樣宣佈了。」
上主愛拯救佢个子民27𠊎个僕人雅各啊，毋使驚；
以色列人啊，毋使著驚。
𠊎愛對遠遠个地方，
你等被人捉去个國家將你等个子孫救出來。
雅各愛轉來故鄉，
安居樂業，無驚麼介。
28𠊎个僕人雅各啊，毋使驚，
因為𠊎㧯你共下。
𠊎愛將𠊎逐你去个該兜國家完全消滅；
總係𠊎毋會消滅你。
𠊎愛用公正管教你，
做毋得毋責罰你。
𠊎 — 上主恁樣宣佈了。
Who We AreWhat We EelieveWhat We Do
2025 by iamachristian.org,Inc All rights reserved.
