何西阿書 14 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

何西阿勸以色列人歸向上主

1 以色列人啊，你等个罪使你等跌倒了；你等愛歸向上主 — 你等个上帝。

2你等愛轉到上主這位，向佢祈禱講：「求你赦免𠊎等所有个罪過，聽𠊎等个祈禱，俾𠊎等用嘴頌讚來代牛牯獻上。

3亞述人無可能救𠊎等；戰馬也無可能保護𠊎等。𠊎等無愛再向偶像講：『你係𠊎等个上帝。』上主啊，𠊎等知，孤兒做得在你該位得到憐憫。」

上主應許以色列人新生命

4上主講：

𠊎愛醫𠊎子民悖逆所受个傷害，

甘心惜佢等；

𠊎無愛再向佢等發譴。

5𠊎係以色列人燥地个甘露。

佢等愛像開等个百合花，

像黎巴嫩个大樹深深釘根在泥肚。

6佢等愛爆新芽，

像橄欖樹恁靚；

佢等愛發出香味，

像黎巴嫩个香柏樹。

7人會再一擺住在佢等个樹影下。

佢等會五榖豐登，

興旺像出產多多个葡萄園。

佢等个名聲會像黎巴嫩个美酒。

8 以色列人愛㧯偶像切斷關係 。

𠊎愛聽以色列人个祈禱，照顧佢等。

𠊎愛像長青樹庇蔭佢等；

佢等會對𠊎得到一切个福氣。

最尾个話

9願聰明智慧个人全部明白這本書个記載；願佢等記在心中。上主个道路係正直个；正直个人遵行這道路，總係罪人因為藐視這道路就跌倒。