1上主啊，𠊎个心仰望你！
2𠊎个上帝啊，𠊎倚靠你！
求你莫使𠊎堵到見笑，
莫俾仇敵贏𠊎來誇口。
3凡仰望你个確實毋會見笑；
無緣無故悖逆你个會失盡面子。
4上主啊，求你將你个道路指示𠊎，
將你个細路教示𠊎。
5求你用你个真道帶領𠊎，教示𠊎，
因為你係拯救𠊎个上帝；
𠊎日夜所仰望个就係你。
6上主啊，莫毋記得你个痛惜㧯不變个慈愛，
因為該兜係你對古早以來就有个。
7求你莫記等𠊎後生个時所犯个罪㧯過失；
上主啊，求你因為你个恩惠，用你个慈愛顧念𠊎！
8上主係至善个、最正直个，
所以佢指示罪人應當行个路。
9佢帶領謙卑个人行正路，
將佢自家个旨意教佢等。
10所有遵守佢个約㧯法令个，
上主用慈愛㧯信實帶領佢等。
11上主啊，雖然𠊎个罪惡非常大，
總係，因為你个名，求你赦免𠊎。
12麼人敬畏上主，
上主就指示佢應當擇个路。
13佢一生人會享受福氣；
佢个子孫會承接佢个土地。
14上主同敬畏佢个人親密交通；
佢使佢等認識佢个約。
15𠊎个目珠一直仰望上主；
只有佢能救𠊎脫離羅網。
16上主啊，轉身來憐憫𠊎，
因為𠊎又孤單又困苦。
17𠊎心中个憂愁緊來緊多；
求你救𠊎脫離這兜患難。
18求你看顧𠊎个艱難痛苦；
求你赦免𠊎一切个罪過。
19你看，𠊎个仇敵有恁多！
你看，佢等怨恨𠊎恁深！
20求你保護𠊎个性命，
求你拯救𠊎；
求你莫使𠊎見笑，
因為𠊎倚靠你。
21願誠實㧯正直做𠊎个保護，
因為𠊎仰望你！
22上帝啊，求你救贖以色列，
使佢等脫離一切个患難！
Who We AreWhat We EelieveWhat We Do
2025 by iamachristian.org,Inc All rights reserved.
