詩篇 14 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

人个邪惡(詩篇 53) 大衛个詩，交給聖歌隊長。

1戇人心內講：

「無上帝！」

佢等盡腐敗，專門做可惡个事；

佢等無一儕行善。

2上主對天頂看世間人，

愛看敢有明理个人，

有尋求上帝个人麼。

3總係，佢等全部偏走，

攏總共樣腐敗。

佢等無人行善，

連一個乜無。

4上主講：「做壞事个人樣般恁無智識？

佢等吞食𠊎个子民，就像食飯一樣；

佢等從來毋識求問𠊎。」

5總講，佢等會驚到愊愊掣，

因為上帝同義人共下。

6你等壞人想害窮苦人个計劃失敗；

總係上主做佢个避難所。

7願以色列个拯救對錫安出來！

上主回復佢子民个產業該時，

雅各个子孫愛大歡喜，

以色列个人民愛快樂。