耶利米書 47 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

有關非利士个預言

1在埃及王攻打迦薩以前，上主對先知耶利米講起有關非利士个事。

2上主講：

看啊，河壩水會對北方漲起來，

造成水災。

大水會浸掉全地㧯其中所有个，

吞掉城市㧯城肚个人民。

人會大聲喊救命；

所有个人民會大噭。

3佢等會聽到戰馬猋个聲，

戰車𠾐𠾐滾，車輪仔轆轆滾个聲！

做阿爸个雙手痠軟無力，

無辦法看顧自家个子女。

4毀滅一切非利士人个日仔到了；

頭擺幫助泰爾、西頓个人，

愛消滅佢等个時間到了。

𠊎 — 上主愛消滅非利士人，

消滅對克里特島 海滣來个賸到个人。

5 迦薩人剃光頭表示悲傷。

亞實基倫恬恬像死城一樣。

平原賸到个非利士人啊，

還愛割傷自家 悲傷幾久呢？

6你等喊講：「上主个刀劍啊，

你愛㓾幾久正停呢？

收劍入刀鞘，

俾它歇睏啊！」

7總係，𠊎喊它攻擊，

它樣做得停呢？

𠊎命令它攻擊亞實基倫，

㓾掉海滣个人民。