1上主啊，求你垂聽𠊎要求公義个呼聲！
求你留心聽𠊎个哀求；
求你聽𠊎誠心个祈禱！
2願你宣判𠊎做無罪；
願你个目珠看顧正直。
3你試驗𠊎个內心，
暗晡時也鑒察𠊎；
你盡徹底考驗𠊎，
總係尋無麼介壞念頭。
𠊎識立志毋俾嘴犯罪；
4𠊎行事為人照你个教訓，
遠離強暴人所行个道路。
5𠊎一直行你所指定个道路；
𠊎个腳步也從來毋識走趲。
6上帝啊，𠊎求你，因為你會應𠊎；
求你耳公側側，來聽𠊎个祈禱。
7求你顯出奇妙个慈愛，
伸你个右手來拯救𠊎；
囥在你底背避難个人，
就能脫離仇敵个攻擊。
8求你保護𠊎，像保護目珠仁；
將𠊎囥在你翼胛个陰影下，
9俾𠊎脫離該兜壞人个攻擊。
仇敵圍困𠊎，想愛害死𠊎；
10佢等个心盡硬，無憐憫；
佢等講話驕傲。
11無論閃去㖠位，佢等還係圍困𠊎；
佢等目瞋瞋，想愛將𠊎㩳橫落去。
12像獅仔一樣，佢等想愛將𠊎扯爛，
像少壯獅仔，在暗暗个所在埋伏。
13上主啊，䟘起來，當面制伏佢等！
求你用你个劍救𠊎脫離壞人。
14求你用你个大權能來拯救𠊎，
俾𠊎脫離該兜今生富足个人。
求你用大災難來責罰該兜人；
俾佢等个子女共樣受盡刑罰，
連佢等个子孫也承到屙糟災 。
15因為𠊎正直，𠊎一定會有好朝見你个面；
𠊎一睡醒，你个同在就會使𠊎心滿意足。
Who We AreWhat We EelieveWhat We Do
2025 by iamachristian.org,Inc All rights reserved.
