耶利米書 10 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

拜偶像㧯正經个敬拜

1 以色列人啊，你等愛聽上主向你等講个話。

2上主恁樣講：

你等毋好學列國个風俗習慣，

也毋好像列國恁樣被天頂个萬象嚇倒。

3佢等所信奉个全係虛空，

不過係對樹林中斬下來个樹仔，

木匠師傅用刀仔雕刻个作品，

4然後鑲金鑲銀來打扮，

用釘仔㧯鎚仔來固定，

使它兜毋會橫掉。

5佢等个偶像像瓜田肚用禾稈紮个人：

它兜毋會講話，

毋會行路，愛人扛等行。

所以毋使驚它兜！

它兜毋會降災，

也無能力降福。

6上主啊，無人㧯你比抑得；

你當偉大，你个聖名大有能力。

7你係萬國个君王，麼人敢毋敬畏？

你應該受尊敬。

列國个智慧人㧯君王無一儕㧯你比抑得。

8佢等全部戇戇檔檔；

佢等對樹仔刻个偶像領受虛假个教訓。

9佢等个偶像鑲等對他施進口个銀仔，

㧯對烏法進口个金仔，

全部係木匠㧯銀匠个手工。

它兜著藍色、紫色个衫褲，

全部係手藝盡好个人刺个。

10上主啊，只有你係真神，

係永生个上帝，永遠个君王。

你一發譴，大地就緊顫；

你一受氣，萬國就企毋住。

11𠊎个子民啊，你等愛向佢等宣告，偶像毋係創造天地个神；它兜一定會對天地間消滅。

頌讚上帝个詩

12上主用能力創造大地；

佢用智慧建立世界，

用聰明展開天空。

13佢一響雷公，天空个水就吼吼滾；

佢使雲對地平線衝等上。

佢使𥍉爧在雨中發光；

佢使風對自家个倉庫吹出。

14人對這光景全部戇檔，無智識；

打金師傅造偶像，反轉無面子，

因為佢等造个神明係假个，毋會透氣。

15偶像全係虛空，係當見笑个東西；

上主審判个時，它兜全部會消滅。

16 雅各个上帝毋係像這兜偶像：

佢創造萬物，

揀選以色列做自家个子民。

上主 — 萬軍个元帥係佢个名。

預言佢等會流亡

17受包圍个耶路撒冷人啊，將你等愛帶走个東西收好。

18因為上主這下愛將你等對這土地拂出去。佢愛降災難在你等身項，你等會被人捉走。上主恁樣宣佈了。

19 耶利米代表耶路撒冷人講：

慘了！𠊎樣會著傷到恁嚴重？

總係𠊎也會想：

「這个痛苦係𠊎一定愛忍受个。」

20𠊎个帳篷被人破壞，

帳篷个索仔全部斷掉。

子女離開𠊎走淨淨了；

毋會再有人來㧯𠊎搭帳篷，

也無人來㧯𠊎吊布簾。

21因為𠊎等个領袖無智識；

佢等毋尋求上主。

所以，佢等失敗，

人民全部四散掉。

22聽啊！有風聲傳來講：

「有看到一大群軍隊對北方來，

會使猶大逐隻城市荒掉，

成做野狗个竇。」

23上主啊，𠊎知無人能決定自家个命運；

無人能安排自家个前途。

24上主啊，求你照公當來管教𠊎等；

求你毋好在發譴中消滅𠊎等。

25求你將大發譴倒在毋承認你个列國，

㧯毋敬拜你个人身上。

因為佢等㓾雅各个後代；

佢等徹底毀滅𠊎等，

使𠊎等个家園荒廢。