1像公主恁高貴个細妹仔啊，
你著涼鞋个腳實在非常靚！
你圓滑个腳髀像寶貝个玉石，
絕對係藝術家傑出个作品！
2你个肚臍當像圓酒杯，
底背裝等滿滿个好酒。
你个腰身像一堆麥仔，
四周圍有百合花圈等。
3你个乳菇像一對細鹿仔，
也像雙生个羚羊。
4你个頸筋像象牙塔；
你个目珠像希實本城、巴特‧拉併門堘个水池。
你个鼻公像對等大馬士革城个黎巴嫩塔。
5你个頭那在你身上像迦密山；
你个頭那毛烏金烏金，
君王 个心已經被它迷到了。
6你實在盡靚，實在得人惜！
親愛个啊，你 俾𠊎歡喜快樂！
7你个身材像棕樹恁直；
你个乳菇像樹頂歸葩个果子。
8𠊎愛爬上棕樹頂去摘果子。
𠊎看你个乳菇像兩串葡萄；
你透出來个氣像蘋果恁香；
9㧯你唚嘴就像啉上好个酒。
(新娘)俾好酒流入𠊎情郎个嘴肚，
流在佢个嘴唇㧯牙齒之間 。
10𠊎屬𠊎个情郎；
吾情郎戀慕𠊎。
11情郎啊，𠊎等來去野外，
共下在鄉下 該位過夜。
12𠊎等愛打早䟘起來，去葡萄園，
看葡萄綻筍、開花吂，
看石榴花開吂；
在該位，𠊎愛將𠊎个愛情獻給你。
13你會鼻到催情果个香味；
逐樣上好个果子堆在𠊎等个門口。
𠊎个情郎，無論新个舊个，
𠊎全部為你留等！
Who We AreWhat We EelieveWhat We Do
2025 by iamachristian.org,Inc All rights reserved.
