1𠊎个子民啊，愛留心聽𠊎个教導；
你等愛側耳聽𠊎所講个話。
2𠊎愛用比喻來說明；
𠊎愛講歷史个奧妙：
3就係𠊎等所聽過所知个事，
係𠊎等个祖先㧯𠊎等講个。
4𠊎等無愛對子孫囥等這兜事情；
𠊎等一定愛對下一代个人說明：
上主个美善、佢个大能、
㧯佢一切奇妙个作為。
5佢頒佈法令給雅各个後代；
佢制定誡命給以色列人民。
佢下命令給𠊎等个祖先，
愛將佢个法律傳給子孫，
6使後代人有好學習，
又傳給佢等个子孫。
7恁樣，佢等也會信靠上帝，
毋會毋記得上帝所做个事，
反轉會遵守佢个誡命。
8佢等正毋會像祖先一樣；
佢等係硬頸悖逆个百姓，
對上帝無堅定个信心，
對佢也無永久个忠心。
9 以法蓮个子孫雖然有弓箭，
總係開戰該日就轉身逃走。
10佢等無遵守上帝个約；
佢等毋服從佢个教示。
11佢等毋記得佢所做該兜事情，
毋記得佢行給佢等看个神蹟。
12上帝在瑣安个平原，在埃及，
在佢等祖先个面前行神蹟。
13佢將海分開，帶領佢等過去；
佢使海水像牆壁恁樣企等。
14日時頭，佢用雲彩帶領佢等；
暗晡時，佢用火光引導佢等。
15佢在曠野使磐石裂開，
給佢等有像深淵恁多个水好啉。
16佢使磐石噴出盡多水，
像河壩水恁樣流等下。
17總係，佢等還繼續得罪上帝，
在曠野悖逆至高者。
18佢等故意試探上帝，
隨心所愛个討食物。
19佢等褻瀆上帝，講：
「上帝能在曠野辦桌席嗎？
20有影，佢實在有打磐石，
使水噴出，像河壩水流等下；
總係佢還有辦法給𠊎等糧食嗎？
佢有法度為佢个子民預備肉嗎？」
21上主聽到這個話就大發譴。
佢用火攻擊佢个子民雅各；
佢對以色列譴到火氣當𤏸；
22因為佢等毋相信上帝，
也毋倚靠佢个拯救。
23總係，佢還係向天下令，
吩咐打開天門；
24佢對天頂賜佢等糧食，
降下嗎哪來養育佢等。
25人就食到天使个食物；
係上帝使佢等得到飽足。
26佢先使天空吹起東風，
又用權能喊南風吹來。
27佢使肉像塵灰恁樣降下來，
使飛鳥像海沙恁多賜給佢等；
28佢使飛鳥落在營房中，
在佢等布篷个四周圍。
29佢等全部有好食，食到飽𩜰𩜰；
上帝照佢等所貪愛个賜給佢等。
30總係佢等還當貪食，
佢等个嘴還嚼等个時，
31上帝就對佢等大發譴，
㓾死佢等當中个好漢，
收掉以色列最優秀个後生人。
32雖然經歷這一切，
佢等還係繼續犯罪；
就算發生這兜奇事，
佢等還係毋肯相信。
33所以佢使佢等个年日變做虛空，
使佢等个生命忽然間堵到災難。
34佢一㓾人个時，佢等就求喊佢；
佢等悔改，迫切尋求上帝。
35佢等想起上帝係佢等个磐石，
至高个上帝係佢等个救贖者。
36總係佢等講花撩騙佢；
佢等對佢講虛假个話。
37佢等對佢盡無忠心，
也無真實守佢个約。
38雖然恁樣，上帝痛惜佢个子民：
佢赦免佢等个罪，無消滅佢等；
一擺又一擺，佢忍等無大發譴。
39佢體恤佢等不過係肉身定定，
像一陣風，吹過去就無倒轉來。
40佢等在曠野再三悖逆上帝；
佢等一直在沙漠使佢傷心！
41佢等一擺又一擺試探上帝，
惹以色列个至聖者大發譴。
42佢等毋記得佢無窮个大能，
並佢救佢等脫離仇敵个日仔。
43佢等毋記得佢在埃及行个神蹟，
並佢在瑣安平原所做个奇事：
44佢將河壩个水變做血，
使埃及人啉毋得。
45佢使烏蠅歸群來拑啄佢等，
使蝦蟆蹧踏佢等个田地。
46佢使佢等个五榖被細草蜢食掉，
喊大草蜢將佢等个田園損淨淨。
47佢用冰雹毀滅佢等个葡萄樹，
落霜來打壞佢等个無花果樹。
48佢用冰雹㧹死佢等个牛群，
又用𥍉爧 傷害佢等个羊群。
49佢向佢等發出烈怒、受氣、災禍；
佢个大發譴像死个使者一樣打擊佢等。
50佢無再忍等佢个怒氣；
佢毋肯饒佢等个性命；
佢使佢等發瘟來死掉。
51佢㓾死埃及逐家个長子，
就係含屋下勇壯个頭胎。
52後來，佢就像牧者一樣，
將自家个子民帶出來，
也帶領佢等經過曠野。
53在佢个帶領之下，佢等盡平安，無驚無愁；
總係佢等个敵人就被海水浸死淨淨。
54佢𢱋佢等到佢个聖地，
來到佢親自征服个山。
55佢在佢子民个面前將外族人逐走，
將該土地分配給佢个子民，
將外族人个家園交給以色列个各支族。
56總係，佢等試探至高个上帝，
悖逆佢，毋肯服從佢个誡命。
57佢等同祖先一樣悖逆，無忠心；
佢等像鬆掉个弓一樣靠毋得。
58佢等起外邦神明个祭壇來惹佢發譴；
佢等用雕刻个偶像來引起佢个嫉妒。
59上帝一聽到就發譴，
將以色列完全棄絕。
60佢㧒掉該起在示羅
个聖所，就係佢在人間所搭个帳篷。
61該彰顯佢个權能㧯榮光个約櫃，
佢由在它被敵人搶走。
62佢對自家个子民發譴，
俾佢等死在刀劍之下。
63佢等个後生被戰火燒滅；
佢等个妹仔尋無人好嫁。
64佢等个祭司被刀劍㓾死；
佢等中間个寡婦無法噭。
65最後，主像睡醒一樣，
像勇士酒後清醒。
66佢打退佢个敵人，
使佢等永遠見笑。
67佢棄絕約瑟个後代，
無揀選以法蓮支族。
68佢揀選个係猶大支族，
還有佢所惜个錫安山。
69佢在該位起聖殿，高到堵天，
像大地企到在在，直到永遠。
70佢揀選佢个僕人大衛，
對羊欄當中擇佢出來，
71使佢毋使再掌羊群，
立佢做以色列个王，
做上帝子民个牧者。
72 大衛全心牧養佢等；
佢盡精明帶領佢等。
Who We AreWhat We EelieveWhat We Do
2025 by iamachristian.org,Inc All rights reserved.
