1天哪，注意聽𠊎講；
地啊，留心聽𠊎个話。
2𠊎个教導像雨點落下來，
像露水滴落大地。
𠊎个話像雨毛滋潤嫩草，
像甘霖淋濕花木。
3𠊎愛宣揚上主个聖名；
你等愛歌頌𠊎等上帝个偉大。
4上主係保護𠊎等个磐石；
佢个作為完全，
佢个道路公正；
佢係信實、可靠个上帝，
佢又係公義、又係正直。
5總係你等對佢無忠心，
無資格做佢个子女，
你等係犯罪、詐欺个一代。
6你這兜無智識个戇百姓啊，
樣般敢恁樣來報答上主啊？
佢係你等个創造主，你等个阿爸；
佢創造你等，使你等成做國家。
7你等愛回想頭擺；
你等愛思念歷史。
你等愛請父老指示；
你等愛請長輩說明。
8至高者分配各國个領土，
將人類分開該時，
佢就照以色列人个數目，
劃定萬民个國界。
9佢選雅各个子孫做自家个子民，
因為佢等就係上主特別个產業。
10佢在曠野尋到佢等，
在飛沙走石个荒地看到佢等。
佢愛護佢等，照顧佢等，
像保護自家个目珠仁。
11鷹鳥罅藪教子學飛，
打開翼胛揹細鷹鳥；
上主也用翼胛來揹，
使以色列毋會跌死。
12上主自家帶領佢个子民，
毋使其他神明來協助佢。
13佢使佢等統治高地，
享受田園出个土產。
佢等食石縫中个蜂糖，
石頭地出產个橄欖油。
14佢等个牛羊有捋毋掉个乳汁；
佢等有最好个綿羊、山羊、
佢等有巴珊个牛豭、羊豭；
佢等有上等个麥仔㧯葡萄酒。
15這正直个子民 漸漸肥壯；
佢等一富強就開始悖逆。
佢等離開創造佢等个上帝；
佢等㧒掉拯救佢等个磐石。
16佢等拜偶像惹上主嫉妒；
佢等做壞事惹佢大發譴。
17佢等獻祭給鬼神、給假神，
給佢等毋認識个神明；
這兜神明係最近正出現个，
係佢等个祖先完全毋驚个。
18佢等毋搭佢等个磐石、佢等个阿爸；
佢等毋記得賜生命給佢等个上帝。
19上主看到這个壞行為就發譴；
佢㧒掉自家个子女。
20佢講：
「𠊎愛揞面毋幫助佢等，
愛看佢等个結局樣般；
因為佢等係硬頸个一代，
係無忠心个子女。
21佢等用『毋算係神』个偶像激𠊎嫉妒；
佢等用假神惹𠊎受氣。
所以，𠊎愛用『毋算係子民』个民族來激佢等嫉妒；
𠊎愛用戇檔个國惹佢等受氣。
22𠊎个大發譴像火燒，
愛燒掉地上所有个；
𠊎一發火，陰間就𤏸起來，
連大山个根基也燒淨淨。
23「𠊎愛用災難來打擊佢等；
𠊎愛用所有个箭射佢等。
24佢等若毋係餓死，就係病死；
得人驚个瘟仔愛消滅佢等。
佢等會被當毒个蛇咬傷；
盡惡个野獸愛攻擊佢等。
25戰爭使孤兒流浪街頭；
相㓾使寡婦空守間房。
壯丁少女死淨淨；
老人細子死光光。
26𠊎本來應該滅掉佢等，
使天下人毋記得佢等；
27總係𠊎毋俾敵人誇口，
𠊎毋俾仇敵妄想，
講係佢等打贏𠊎个子民；
其實係𠊎親手毀滅佢等。」
28 以色列係無常識个民族；
佢等當中無半儕有智識。
29佢等想毋出失敗个原因；
佢等毋明白自家个結局。
30一個人做麼介能逐散千人？
兩個人能使萬人到處逃走？
因為佢等个磐石賣掉佢等，
大能个上主自家㧒掉佢等。
31敵人就知自家个神明無才調，
無像以色列个磐石大有能力。
32敵人像所多瑪、蛾摩拉恁敗壞，
像葡萄樹結當苦當毒个果子。
33佢等个酒就像毒蛇个口水恁毒。
34上主記得敵人个壞行為，
時機一到就愛責罰佢等。
35上主愛向敵人報仇；
到時佢等就會敗壞。
佢等滅亡个日已經近了，
佢等个終局盡遽就會到。
36上主看到佢个子民，
無論做奴才个抑係自由个，
全部失敗無力，
就為佢等伸冤，
憐恤佢个僕人。
37上主愛責備佢个子民：
「你等所拜个神明在㖠位？
你等靠个細石頭在㖠位？
38你等用牲儀个油餵過它兜，
你等用敬神个酒灌過它兜。
這下喊它兜來幫助啊！
大聲喊它兜來保護啊！
39「你等這下愛看清楚！
𠊎，只有𠊎正係上帝，
在𠊎以外無別个神。
𠊎使人死，也使人生；
𠊎打傷人，也醫治人；
無人能脫離𠊎个手。
40𠊎用𠊎永遠个生命，
向天擎手來發誓講：
41𠊎愛磨利皓光个劍，
愛執行公道个審判；
𠊎愛責罰敵人，
報應恨𠊎个人。
42𠊎个箭頭愛啉血啉到醉，
就係被人㓾被人捉个血。
𠊎个利劍愛食佢等个肉，
就係仇敵中領袖个頭那。」
43列國啊，愛為上主个子民歡喜！
因為上主為佢个僕人討血債。
佢愛報應佢个仇敵；
佢愛潔淨佢个土地，
佢愛救贖佢个子民。
44 摩西㧯嫩个孻仔約書亞在以色列全會眾面前大聲讀這首詩。
摩西臨終个話45 摩西將上帝个教訓向以色列人民宣告後，
46對佢等講：「你等一定愛將𠊎今晡日向你等頒佈个這兜誡命記在心中，又愛傳給你等个子女，喊佢等確實遵行這法律一切个話。
47這兜誡命毋係無用个話，係你等个生命。你等遵行，就做得長久住在約旦河對面 — 你等愛入去佔領个該垤土地。」
48該日，上主對摩西講：
49「你愛到耶利哥城對面、就係摩押地个亞巴琳山區，跋上尼波山，對該位遠遠看迦南地，就係𠊎愛賜給以色列人个土地。
50你愛死在該山頂，歸祖宗該位去，像若哥亞倫死在何珥山頂，歸祖宗該位去一樣，
51因為你兩儕在以色列人面前違背𠊎。你等在尋个曠野，加低斯城附近个米利巴泉水滣，在人民面前無尊𠊎為聖。
52所以，你做得對遠遠个地方看𠊎愛賜給以色列人个土地，總係你做毋得入去。」
Who We AreWhat We EelieveWhat We Do
2025 by iamachristian.org,Inc All rights reserved.
