1佢又講：「在米底亞人大流士做王个第一年，𠊎負責幫助米迦勒
，使佢堅強。2𠊎這下愛㧯你講个話還係真實个。」
埃及王㧯敘利亞王該天使講：「波斯還愛經歷三個王个統治，直到第四個王出現。這第四個王比其他个王會加盡好額。在佢最有權勢、最富強个時，佢會惹起全國攻擊希臘國。
3「然後有一個勇敢个王會出現；佢會照自家个意思來統治極大个帝國 。
4總係，當佢个權勢到最強盛个時，佢个帝國就會分裂做四部份。佢个後代無法度承接佢个王位，佢个王國會換別人統治，總係無像佢統治个時恁強。
5「埃及王 會變當強，總係佢个將軍當中有一個比佢還較強个會出現，所統治个王國會還較大。
6盡多年後，埃及王會㧯敘利亞王 結盟，將妹仔嫁給佢。總係這聯盟毋會維持長久。這個埃及公主㧯姖个老公、細人仔 ，並同姖共下去个僕人全部會被人㓾掉。
7無幾久後，姖个一個親戚會做埃及王，並攻擊敘利亞王个軍隊，進入佢等个城堡，打贏佢等。
8佢會將佢等个神像㧯神廟肚个金器、銀器全部帶轉埃及。經過幾年个太平日仔後，
9敘利亞王會去侵略埃及，總係最後會被人逐轉去。
10「敘利亞該兜王子會好好準備相㓾，召集極多个軍隊。其中一個王子會像大水恁樣攻打敵人个城堡。
11埃及王會大發譴，帶領軍隊出去相㓾，攻打敘利亞王，捉到佢極多个軍隊。
12埃及王會因為消滅歸萬人得到勝利，就變到非常驕傲，總係佢个勝利毋會維持盡久。
13「敘利亞王會轉去召集比以前較多較強大个軍隊；時機一到，佢會帶領裝備良好个強大軍隊倒轉來。
14該時，會有盡多人悖逆埃及王。但以理啊，你同胞中有兜暴徒也會悖逆，使異象實現；總係佢等會被人打輸。
15敘利亞王會圍攻並佔領防衛个城鎮；埃及最精良个軍隊也無法度抵抗佢。
16敘利亞王个侵略會當順利，無人有辦法反抗。佢會佔領該當靚个地 ，完全控制它。
17「敘利亞王會計劃出動全軍去征服埃及。為到愛消滅埃及，佢計劃先㧯埃及結盟，將自家个妹仔嫁過去；總係佢个計劃對佢無利益，毋會成功。
18後來，佢會攻打海滣該兜國家，並佔領其中盡多國。總係有一個外國將軍會打贏佢，阻止佢个惡行，使佢个惡行變成自家个損害。
19佢會撤退轉去自家个城堡，到尾被人消滅；這就係佢个結局。
20「佢以後會有另外一個王接佢个位；這王為到愛增加王國个財富，就派一儕去負責抽當重个稅來壓迫人民。總係無幾久這王就會被人暗殺，毋係死在戰場上。」
敘利亞个暴君21該天使繼續解釋講：「這事以後，有一個邪惡个人會搶到敘利亞个王位。佢無權利承接王位，總係在人無提防个時節，用詭詐个手段搶到政權。
22佢會徹底消滅所有反對个勢力，連上帝个大祭司也在內。
23佢用結約來欺騙別國；佢所統治个雖然係一個細國，總係越來越強大。
24佢會在人無提防个時節侵入國中最豐富个所在，做佢祖先自從毋識做過个事。佢會將戰利品分給部下。佢會計劃攻打城堡，總係佢个日仔並毋會長久。
25「佢會盡勇敢帶領大軍攻打埃及王；埃及王也會用強大个軍隊來㧯佢相㓾，總係毋會成功，因為佢會被叛徒謀害。
26佢最親信个人想愛消滅佢；佢个軍隊會被人消滅，盡多人會在戰場被人㓾死。
27這以後个兩個王會共桌食飯，總係佢等心存惡意，互相欺騙。佢等毋會達成心願，因為指定个日期還吂到。
28敘利亞王會滿載戰利品轉去本國；佢決心愛消滅上帝子民个信仰，就隨自家个意思亂做，然後正轉去本國。
29「到了指定个日期，佢會再向埃及前進；總係這擺个情況㧯以前無共樣。
30羅馬人 个戰船會來攻打佢，害佢驚到無葛無煞。
「敘利亞王會當怨嘆撤退，並拿破壞上帝子民个信仰來出大氣。佢會聽信該兜悖逆信仰个人个建議。
31佢派來个軍隊會褻瀆聖殿，禁止逐日應該獻个祭，又將該『毀滅性、邪惡个東西』放在聖殿底背。
32佢會用詭計來騙到違背聖約者个支持；總係該兜忠心跈上帝个人會剛強起來反抗。
33民間該兜聰明个領袖會教導眾人，使佢等明白；總係，會有一站時間，有兜人會戰死，被火燒死，被人搶劫，被人捉走。
34屠殺進行个時，上帝个子民會得到一些仔幫助定定；雖然盡多人來㧯佢等結盟，總係無誠實。
35有兜聰明个領袖會被人㓾掉，總係佢等个犧牲會洗淨、鍛鍊人民，使佢等成做純潔。這事會繼續，直到上帝所定个結局來到。
36「敘利亞王會隨意亂做，自誇佢比所有神明還較偉大，甚至高過萬神个神 — 上帝。佢會繼續恁樣亂講，直到上帝責罰佢个日仔。上帝一定會實現佢个計劃，絕對毋會改變。
37這個王毋會敬重祖先所拜个神明，也毋會尊重該兜婦人家所愛个神明。其實，佢毋會尊敬所有个神明，因為佢自家恅到比所有个神明還較偉大。
38佢反轉會去拜祖先無拜過、該保護城堡个城隍。佢向這神明獻金、銀、寶石，㧯其他貴重个禮物。
39佢會用信奉異教神明个軍隊保守佢个城堡。中意佢統治个人，佢會賜佢等高官地位治理民眾，又分封土地，來做報賞。
40「結局來到个時，埃及王會出兵攻打敘利亞王。敘利亞王會集合佢所有个軍力，用戰車、戰馬，㧯船隊像暴風來攻擊轉去。佢會侵略盡多國家，像做大水沖到滿地，
41甚至會侵入該當靚个地 ，㓾死歸萬人；總係以東人、摩押人，㧯大部份个亞捫人會脫離佢个手。
42佢攻打該兜國家个時，連埃及也毋會漏掉。
43佢會管理埃及貯存个金銀財寶㧯其他貴重个東西。佢會征服利比亞㧯古實。
44後來對東片㧯北片傳來个風聲害佢盡著驚；佢會大發譴來出兵，愛將盡多人㓾死滅絕。
45佢會在大海㧯盡靚个聖山之間將王宮个大帳篷搭起來。總係佢个死期到了，無人能幫助佢。」
Who We AreWhat We EelieveWhat We Do
2025 by iamachristian.org,Inc All rights reserved.
