1 大衛王住在王宮。上主使佢享受太平，無受四周圍仇敵个侵犯。
2王對先知拿單講：「你看，𠊎住在香柏樹起个王宮，總係上帝个約櫃還在帳篷肚！」
3 拿單對王講：「你就照你个心意去做，因為上主㧯你共下。」
4總係，該暗晡上主對拿單講：
5「去㧯𠊎个僕人大衛講，上主恁樣講：『敢係你起聖殿給𠊎住？
6自從𠊎對埃及帶以色列人民出來到這下，𠊎無住過聖殿；𠊎一直住在帳篷，逐所在徙來徙去。
7𠊎㧯以色列人民共下流浪該兜年日，該兜𠊎選來看顧𠊎子民所有个領袖 ，𠊎從來毋識問過麼人，做麼介毋為𠊎起一座香柏樹个聖殿。』
8「所以，你愛㧯𠊎个僕人大衛講，𠊎 — 上主、萬軍个元帥恁樣講：『你在野地掌羊，𠊎將你呼召出來，立你做𠊎子民以色列个王。
9你無論到麼介地方，𠊎攏總㧯你共下；𠊎除掉你所有个仇敵。𠊎愛使你㧯世界最偉大个人共樣恁有名。
10𠊎為𠊎个子民以色列選一個地方，將佢等安頓在該位，使佢等毋會再被人欺負。自從佢等徙到這垤土地，𠊎又設立士師來治理佢等，佢等卻常常被惡霸欺壓；總係這種事毋會再發生了。
11𠊎愛使你享受太平，毋會被仇敵侵犯。𠊎 — 上主也對你宣告，𠊎愛賜給你有後代。
12你死後㧯祖先葬共下个時，𠊎會立你一個孻仔做王，使佢个國強盛。
13佢正係為𠊎个名起聖殿个人；𠊎愛堅固佢个王位直到永遠。
14𠊎愛做佢个阿爸；佢愛做𠊎个孻仔。佢若犯罪，𠊎會責罰佢，像人用棍仔抑係皮鞭處罰人共樣。
15總係，𠊎毋會收轉𠊎對佢个痛惜，像𠊎收轉對掃羅个痛惜恁樣；𠊎識將掃羅廢掉，立你做王。
16你个後代㧯你个國會在𠊎 面前永遠堅固；你个王位會永遠存在。』」
17 拿單將上帝向佢啟示个逐件事全部㧯大衛講。
大衛感恩个祈禱(歷代志上 17:16-27)18 大衛王入去聖帳篷，到上主面前，坐等祈禱講：「至高个上主啊！你為𠊎所做个一切，𠊎實在堪毋得，𠊎个家族也堪毋得。
19總係，至高个上主啊，你賜給𠊎恁多，甚至應許在將來个日仔愛恩待你僕人个子孫。至高个上主啊，敢講這係平常个小事情嗎？
20至高个上主啊，𠊎還有麼介話好講呢？因為你知你个僕人。
21你恁樣做係因為你所應許个話，也係照你个心意；你做這一切个大事，係為到俾你个僕人明白。
22至高个上主啊，你恁偉大！㖠有㧯你比抑得个！𠊎等知，除了你以外，無別個上帝。
23世間乜無一個國家像以色列；你救以色列人民離開埃及，使佢等做你自家个子民。你為佢等做偉大奇妙个事，使你个大名傳到全世界；你甚至為到自家个子民，將外族㧯佢等个神明全部逐走。
24你使以色列永遠做你自家个子民，你 — 上主也做佢等个上帝。
25「主上帝啊，求你實現你有關𠊎㧯𠊎後代个應許；求你永遠照你所講个話去做。
26願你个名永遠受尊敬；願人民永遠稱頌：『上主 — 萬軍个元帥係治理以色列个上帝！』恁樣，你會 世世代代保守你僕人大衛个王朝。
27上主 — 萬軍个元帥、以色列个上帝啊，𠊎大膽在你面前恁樣祈禱；因為你將這一切向𠊎 — 你个僕人啟示出來，㧯𠊎講，你愛立𠊎个後代做王。
28「至高个上主啊，只有你係上帝。你个話係真實个；你對你个僕人也有恁奇妙个應許。
29這下求你賜福給僕人个後代，使佢等繼續享受你个恩惠。至高个上主啊，你已經應許。願你永遠恩待僕人个後代。」
Who We AreWhat We EelieveWhat We Do
2025 by iamachristian.org,Inc All rights reserved.
