利未記 17 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1上主吩咐摩西

2向亞倫㧯佢該兜孻仔，並以色列全部人民宣佈以下个條例。

3以色列人愛在上主个聖帳篷門口㓾牛牯、綿羊、山羊牯獻給上主做牲儀；若係隨便在營肚抑係營外別个地方㓾頭牲，

4流血个罪就係歸到該人身上。佢既然使血流出，就一定愛對上主个子民中除名。

5這個條例主要个目的係愛以色列人將頭牲帶來獻給上主。以前佢等在野外㓾頭牲，這下愛將頭牲帶到聖帳篷門口來交給祭司做平安祭獻給上主。

6祭司愛將頭牲个血洒在聖帳篷門口、上主个祭壇四周圍，將油燒掉，發出上主所歡喜个香味。

7以色列人絕對做毋得再悖逆上主，在野外㓾頭牲獻給山羊鬼。以色列人一定愛世世代代遵行這條例。

8 以色列人㧯暫時住在佢等當中个旅客，愛在聖帳篷門口獻燒化祭抑係其他牲儀給上主；

9若係隨便在別个地方獻祭，就一定愛對上主个子民中除名。

10若係有以色列人抑係暫時住在佢等當中个旅客，無論食麼介血，上主愛對該食血个人變面，愛將佢對自家个子民中除掉。

11因為動物个生命在血底背，所以上主將血賜給你等，愛在祭壇頂為你等个生命贖罪；因為血底背有生命，所以能贖罪。

12所以，上主禁止以色列人㧯暫時住在佢等當中个旅客食血。

13若係有以色列人抑係暫時住在佢等當中个旅客打獵得到淨浰个野獸抑係鳥仔，一定愛將牠个血放掉，將血用泥埋掉。

14各種動物个生命在血底背，所以上主禁止以色列人食所有動物个血；麼人食動物个血，麼人就愛對上主个子民中除名。

15麼人食到自然死掉个動物抑係被野獸咬死个動物，無論係以色列人抑係暫住个旅客，一定愛先洗淨衫褲，洗身，等到該日臨暗仔以後正算淨浰。

16若係佢毋洗淨衫褲，也毋洗身，佢一定愛擔當自家个罪。