1𠊎係沙崙个玫瑰花，
係山壢肚个百合花。
(新郎)2𠊎个情妹在該兜細妹仔當中，
就像竻藪肚个一蕊百合花。
(新娘)3𠊎个情郎在男人當中，
就像樹林肚个蘋果樹；
𠊎歡喜坐在它个樹影下，
它个果子當甜，合𠊎口味。
4佢帶𠊎入佢宴會个廳下，
在𠊎頂高有愛情个旗仔。
5求你用葡萄乾來補𠊎个元氣，
也用蘋果來恢復𠊎个精神，
因為𠊎著到相思病噢！
6佢用左手托等𠊎个頭那，
用右手揇等𠊎。
7 耶路撒冷个細妹仔啊，請答應𠊎，
請指等羚羊㧯鹿乸發誓；
莫吵𠊎等，毋好㩢耍𠊎等，
俾𠊎等个愛情自由發展 。
第二首(新娘)8聽啊！𠊎情郎个聲！
看啊！佢攀山過嶺向𠊎走來。
9𠊎个情郎像羚羊，像細鹿仔。
佢企等，在𠊎屋下个壁後背；
佢對窗門外背看入來，
對窗格仔向底背偷看。
10𠊎个情郎㧯𠊎講話：
(新郎)䟘起來噢，𠊎个情妹啊！
𠊎个美人，㧯𠊎共下來去噢！
11你看，寒冬已經過掉了；
落雨个時節也過掉了。
12在野外百花已經盡開；
鳥仔唱歌个時節到了，
田野聽得到班鳩个聲。
13無花果開始熟了；
葡萄樹也開花發出香味了。
䟘起來噢，𠊎个情妹啊！
𠊎个美人，㧯𠊎共下來去噢！
14𠊎个月鴿仔啊，你離𠊎恁遠，
像在巖石个窿肚一樣；
俾𠊎看你个面，
俾𠊎聽你个聲；
因為你个面盡靚，
你个聲乜當好聽。
(新娘)15愛捉狐狸，就係該兜毀壞葡萄園个細狐狸 ，
因為𠊎个葡萄樹堵堵當開花！
16𠊎个情郎屬𠊎，𠊎也屬佢。
佢在百合花當中掌羊仔，
17等到清早个涼風吹來，
烏暗漸漸仔離開个時。
𠊎个情郎啊，好轉去了，
就像比特山頂 个羚羊、
抑係細鹿仔走等轉去。
Who We AreWhat We EelieveWhat We Do
2025 by iamachristian.org,Inc All rights reserved.
