撒迦利亞書 10 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

上主答應愛拯救

1在春天你等愛向造𥍉爧个上主求雨。佢就會落充足个雨水，使眾人个田園生產農作物。

2因為向偶像㧯卜卦个求問，所得个回答係虛假个。有兜人講無影無跡个夢，佢等个安慰攏總無用。所以人民流離失所，像羊仔無牧人受苦受難。

3上主講：「𠊎向該兜統治𠊎子民个外族人發譴；𠊎愛責罰佢等。𠊎 — 上主、萬軍个元帥愛照顧自家个羊群，就係猶大个人民，使佢等成做𠊎強壯个戰馬。

4在佢等當中愛產生掌權个領袖，像屋仔个房角石、釘仔、㧯戰爭个弓。

5佢等會像勇士，在戰場制伏仇敵，像在街路踐踏泥糜。佢等愛去相㓾，因為𠊎 — 上主㧯佢等同在；佢等會打贏敵人个騎兵。

6𠊎愛使猶大家強盛，

拯救約瑟个家。

𠊎愛憐憫佢等，帶領佢等轉來；

佢等會像毋識被𠊎㧒掉一樣。

因為𠊎係上主 — 佢等个上帝，

𠊎一定會聽佢等个祈禱。

7 以法蓮人會像勇士；

佢等會像啉酒个人恁樣，心中爽快。

佢等个子女也會因為這擺个勝利來快樂；

佢等个心會因為上主所做个大大歡喜。

8𠊎愛發出信號，聚集佢等。

𠊎愛救贖佢等，

使佢等个人數增加，

像以前恁樣緊增加。

9雖然𠊎將佢等分散到列國中，

佢等在遠方還係會紀念𠊎。

佢等㧯佢等个子女會繼續生存，

有好共下轉來故鄉。

10𠊎愛對埃及將佢等帶轉來，

對亞述帶領佢等出來。

𠊎愛𢱋佢等到基列㧯黎巴嫩；

這兜地方到尾會毋罅佢等住。

11佢等 經過苦海个時，

𠊎愛打海浪，

尼羅河會燥掉。

驕傲个亞述會變做謙卑；

強大个埃及會變無力量。

12𠊎愛使𠊎个子民倚靠𠊎來強盛；

佢等所行所做攏總愛奉𠊎个名。」

上主恁樣宣佈了。