1該日，底波拉㧯亞比挪菴个孻仔巴拉唱這首歌：
2愛頌讚上主！
以色列个軍長決心相㓾，
人民自願從軍。
3君王啊，你等愛聽！
領袖啊，側耳來聽！
𠊎愛向上主彈琴唱歌，
愛歌頌上主 — 以色列个上帝。
4上主啊！你離開西珥山，
你對以東出發，
大地緊顫，天頂落雨，
雲層倒水。
5在西奈个上主 — 以色列个上帝面前，
群山全部緊顫。
6在亞拿个孻仔珊迦个時代，
在雅億个日仔，
生理人毋敢經過這位，
出外人捩到別條路去。
7 底波拉啊，以色列个村莊無人敢住，
逐所在空空，直到你來；
你來做以色列个阿姆。
8 以色列換新个神明，
城門就有戰爭。
四萬以色列人中，
看毋到盾牌㧯槍。
9𠊎向以色列个指揮官忠心，
支持以色列人个志願軍。
愛頌讚上主！
10你等騎白驢个、坐在馬鞍頂个、
行路个全部愛傳揚。
11聽啊，在井堘有人 傳出歡呼！
佢等傳講上主个勝利；
慶祝以色列得勝轉來。
該時上主个子民行到城門歡呼：
12 底波拉啊，興起興起！
興起唱歌，勇敢向前！
亞比挪菴个孻仔巴拉啊，䟘起來！
將你捉到个人帶走！
13忠信个人向佢等个領袖行等去；
上主个子民到佢 面前準備相㓾。
14佢等對以法蓮來 ，進入山壢 ，
跈在便雅憫支族人个後背。
有指揮官對瑪吉出來；
有軍官對西布倫下來。
15 以薩迦个領袖㧯底波拉共下來；
以薩迦來，巴拉也來；
佢等跈佢進入山壢。
總係呂便支族意見講毋和；
佢等無法度做決定。
16你等做麼介跈在羊群後背？
愛聽牧人喊群羊係麼？
係啊，呂便支族意見講毋和；
佢等無法度決定。
17 基列人住在約旦河東片；
但支族做麼介留在船頂？
亞設支族住在海滣；
佢等在海港滣停跎。
18總係西布倫人敢拚命毋驚死；
拿弗他利人在戰場也係恁樣。
19在米吉多河滣个他納，
眾王全部來這位相㓾。
迦南所有个王來戰爭；
總係佢等無帶走銀仔。
20星仔對天頂來援助，
飛過來攻打西西拉。
21 基順个河水沖等下 —
急流將佢等打走。
𠊎愛前進，拚命向前！
22該時戰馬猋等走，
腳蹄聲的的躂躂。
23上主个天使講：愛咒詛米羅斯，
愛大大來咒詛住在該位个人民。
佢等無來幫助上主，
毋來𢯭手攻打強敵。
24 基尼人希百个𡜵娘雅億，
在婦人家中最受人稱讚；
比住帳篷个婦女較蒙福。
25 西西拉向姖討水，姖給佢牛乳；
姖用貴重个碗裝乳油給佢。
26 雅億左手拿帳篷个釘仔，
右手拿等師傅用个鎚仔；
姖盡錘西西拉，打爛佢个頭那，
刺穿佢个太陽穴。
27在雅億腳前，西西拉跔起來，
又橫轉去，橫到直直；
西西拉跔起來，又橫轉去，
佢就斷氣。
28 西西拉个阿姆緊看窗門外背；
在格仔窗門个後背大聲緊問：
佢个戰車做麼介恁久吂轉？
佢个戰馬做麼介還毋轉來？
29姖最聰明个宮女安慰姖，
姖也係自家問自家應講：
30佢等一定係搶當多東西，當分戰利品，
無一定一個兵仔分到一、兩個細妹仔。
可能西西拉分到个係彩色个外衫；
佢定著會帶繡花圍巾轉來給王后。
31上主啊，願你个仇敵全部恁樣滅亡！
願你个朋友像日頭恁光明！
恁樣這地方太平四十年。
Who We AreWhat We EelieveWhat We Do
2025 by iamachristian.org,Inc All rights reserved.
