詩篇 148 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

全宇宙愛頌讚上帝

1哈利路亞！

你等愛對天頂讚美上主！

你等愛在至高个所在讚美佢！

2佢个眾天使啊，你等愛讚美佢！

佢个眾天軍啊，你等愛讚美佢！

3日頭啊，月光啊，愛讚美佢！

緊𥍉个星辰啊，愛讚美佢！

4天頂个諸天啊，愛讚美佢！

天頂个眾水啊，愛讚美佢！

5願這兜讚美上主个名！

佢一下令，就造出一切。

6佢將這兜各就各位，永遠堅固；

佢定了界限，不能超過 。

7你等愛對地上讚美上主！

大海怪啊，深淵啊，

8𥍉爧、冰雹、雪㧯雲霧啊，

遵行佢命令个大風啊，

9所有个大山㧯細山啊，

果子樹㧯各種个樹啊，

10野獸㧯頭牲啊，

爬蟲㧯飛禽啊，

你等攏總愛讚美佢！

11世上个君王啊，天下萬民啊，

大臣啊，世上一切掌權个啊，

12細阿哥仔啊，細阿妹仔啊，

老人家啊，細人仔啊，

你等攏總愛讚美佢！

13願全世界个一切攏總讚美上主个名！

佢个名係至尊个；

佢个榮光超過天地。

14佢使佢个子民強盛 ，

俾佢心所愛个子民，

就係忠心个以色列人，

攏總讚美佢！

哈利路亞！