耶利米書 1 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1這卷書記載耶利米所講个話。耶利米个阿爸希勒家係便雅憫地亞拿突城个一個祭司。

2猶大王亞們个孻仔約西亞做王个第十三年，上主向耶利米講話；

3約西亞个孻仔約雅敬治理猶大國期間，上主又向耶利米講話。對該時以後上主常常向佢講話，一直到約西亞个另外一個孻仔西底家做猶大王个第十一年五月，該時耶路撒冷人被人捉到巴比倫去。

耶利米蒙召

4上主對𠊎講：

5「𠊎使你在阿姆个肚笥成胎以前，𠊎已經認識你；你還吂出世，𠊎已經將你分別做聖，指定你做萬國个先知。」

6𠊎應講：「至高个上主啊，𠊎忒後生；𠊎無嘴碼。」

7總係上主對𠊎講：「你毋好講自家忒後生。無論𠊎派你到麼人該位去，你就去；𠊎吩咐你講麼介，你就講麼介！

8你毋使驚佢等；因為𠊎㧯你共下，𠊎會救你。𠊎 — 上主恁樣宣佈了！」

9然後，上主伸手摸𠊎个嘴，對𠊎講：「你看，𠊎將𠊎个話放在若嘴肚。

10𠊎今晡日將權柄交給你；你愛在萬國萬民中做挷出、拆掉、破壞、推翻、重建、㧯栽種个工作。」

兩隻異象

11上主問𠊎：「耶利米啊，你看到麼介？」

𠊎應講：「𠊎看到一支杏樹桍。」

12上主講：「無毋著！𠊎一直關心留意 ，愛使𠊎个話得到實現。」

13上主又問𠊎：「你還看到麼介？」

𠊎應講：「𠊎看到燒等滾水个鑊頭，對北方向這片倒過來。」

14上主對𠊎講：「會有災難對北方來，臨到住在這地方所有个人民。

15因為𠊎愛召集北方所有个國家；它兜个君王會來佔領耶路撒冷，統治歸隻城㧯猶大國所有个城市。

16𠊎愛責罰𠊎子民所犯一切个罪惡；佢等離開𠊎，去燒香給別个神明，拜自家手所造个偶像。

17耶利米啊，你愛準備好，企起來，將𠊎命令你講个一切話㧯佢等講。毋好驚佢等；若無，𠊎就使你在佢等面前著驚。

18耶利米啊，你注意聽！猶大全國 — 君王、官長、祭司㧯人民全部會反對你。總係，𠊎今晡日愛賜給你力量抵抗佢等；你會像城堡、鐵柱、銅牆恁堅固。

19佢等無可能贏過你；因為有𠊎㧯你共下，𠊎會救你。𠊎 — 上主恁樣宣佈了。」