1𠊎等被人捉去个第十二年十二月初一，上主㧯𠊎講話。
2佢講：「人子啊，你愛警告埃及王，為佢做哀歌，向佢傳𠊎个話講：以前你在列國中像少壯獅仔；這下你較像係河壩肚个鱷魚定定。你在河壩肚摝水，用腳攪河壩肚个泥，使河壩水變渾渾。
3盡多國家个人民聚集个時，𠊎 — 至高个上主愛委𠊎个網仔捉你，喊佢等將網仔拉上來。
4𠊎愛將你㧒在地上，豁在荒地，喊所有空中个飛鳥㧯地上个走獸來食你。
5𠊎愛用你糜掉个屍體鋪滿山嶺，坉滿山壢；
6𠊎愛用你流出个血，拿去滿遍緊潑，使它對山頂一直流入河壩。
7𠊎毀滅你个時愛遮等天，使星仔暗掉，用烏雲抵等日頭，月光也無發光。
8𠊎愛關掉天頂所有个光，使你个土地變做烏暗。𠊎 — 至高个上主恁樣宣佈了。
9「𠊎將你滅亡个消息傳到你毋識个國家，該兜人民个心會當憂愁。
10𠊎在盡多國民㧯國王面前向你比一下劍，該兜國王㧯國民就會著驚起來。佢等看到𠊎樣般消滅你，一想到自家个命運就無葛無煞。」
11至高个上主講：「你一定會承到巴比倫王个刀劍。
12𠊎愛喊該兜當惡个國家來攻打你；佢等个勇士愛用劍㓾掉你个人民。埃及所有个人民㧯埃及所誇口个一切全部愛消滅掉。
13𠊎愛在河壩滣㓾掉你个頭牲；毋會再有人抑係頭牲來攪河壩肚个泥，使河壩水變渾渾。
14𠊎愛使尼羅河个水變清；𠊎愛使河壩水像油流恁慢。𠊎 — 至高个上主恁樣宣佈了。
15𠊎使埃及荒廢、使這地所充滿个絕掉、消滅姖个人民該時，佢等就會知𠊎係上主。
16這警告會成做一首哀歌。各國个婦人家全部愛為埃及㧯姖个人民唱這首哀歌。𠊎 — 至高个上主恁樣宣佈了。」
陰間17𠊎等被人捉去个第十二年十二月 十五，上主㧯𠊎講話。
18佢講：「人子啊，你愛為埃及个人民大噭，然後將埃及㩳入陰間；俾姖㧯該兜強國个人民共樣落去陰間最深个所在，同所有落在該底背个人共下。
19你愛對佢等講：
你恅到你比別人較靚係麼？
落去陰間，㧯無敬虔个人橫共下。
20「埃及人愛㧯該兜被刀劍㓾死个人橫共下。埃及一定愛死在刀下；愛將姖㧯屬姖个眾人拖出去。
21最勇个戰士愛在陰間迎接埃及人㧯幫助埃及个人。佢等喊：『該兜無敬虔、被刀劍㓾死个人全部落到陰間來了；佢等全部橫在這位！』
22「亞述在該位，周圍全部係姖戰士个塚埔。佢等全部係被刀劍㓾死个。
23佢等个塚埔在陰間最深个所在。姖所有个戰士全部係被刀劍㓾死个，佢等个塚埔圍等姖个墳墓。佢等還生个時害人驚到愊愊掣。
24「以攔在該位，周圍全部係姖人民个塚埔。佢等落到陰間係被刀劍㓾死个；佢等係無敬虔个人。佢等還生个時，識害人驚到愊愊掣，這下㧯落在陰間个人共下受侮辱。
25以攔橫在戰死个人當中，周圍全部係姖人民个塚埔。佢等全部係無敬虔、被刀劍㓾死个。佢等還生个時，識害人驚到愊愊掣，這下㧯落在陰間个人共下受侮辱。
26「米設㧯土巴也在該位，周圍全部係佢等人民个塚埔。佢等全部係無敬虔、被刀劍㓾死个。佢等還生个時，識害人驚到愊愊掣。
27佢等無像頭擺 个英雄，葬禮盡有哀榮，著全副武裝，頭枕刀劍，胸蓋盾牌 ，橫在陰間。這兜英雄還生个時十分威風，識害人驚到愊愊掣。
28「埃及王啊，你會照樣受毀滅，橫在該兜無敬虔、被刀劍㓾死个人當中。
29「以東在該位；姖个君王㧯統治者全部係最勇敢个戰士。這下佢等㧯該兜無敬虔、被刀劍㓾死个人共下橫在陰間。
30「所有北方个領袖全部在該位；西頓人也在該位。佢等个勢力識害人驚到愊愊掣。這下佢等㧯該兜無敬虔、被刀劍㓾死个人共下到陰間受侮辱，橫在該位。」
31至高个上主講：「埃及王㧯佢个軍隊因為看到這兜被刀劍㓾死个人，就會得到安慰。
32「𠊎識用埃及王害還生个人驚到愊愊掣，總係佢㧯佢个軍隊全部愛被刀劍㓾死，㧯該兜無敬虔、被刀劍㓾死个人橫共下。」至高个上主恁樣宣佈了。
Who We AreWhat We EelieveWhat We Do
2025 by iamachristian.org,Inc All rights reserved.
