1上主吩咐摩西
2㧯以色列人講：「𠊎係上主 — 你等个上帝。
3你等住過埃及，總係你等做毋得學該地方个風俗。𠊎愛𢱋你等入迦南地，總係你等也做毋得學該地方个風俗。做毋得跈佢等个壞規矩。
4你等愛遵守𠊎个法律，實行𠊎个命令。𠊎係上主 — 你等个上帝。
5你等愛遵守𠊎个法律㧯命令；恁樣，你等就能得到生命。𠊎係上主。
6「無論麼人全部做毋得㧯骨肉之親亂倫。𠊎係上主。
7「做毋得㧯自家个阿姆亂倫，羞辱阿爸；做毋得侮辱自家个阿姆。
8「做毋得㧯阿爸其他个𡜵娘亂倫，羞辱阿爸。
9「做毋得㧯自家个親姊妹、無共阿姆抑係無共阿爸个姊妹亂倫；不管姖係毋係從細㧯你在屋下共下生活到大。
10「做毋得㧯自家个孫女抑係外孫女亂倫，這係羞辱你自家。
11「做毋得㧯無共阿姆个姊妹亂倫，因為姖也係你个姊妹。
12「做毋得㧯自家个阿姑
13抑係阿姨亂倫。
14「做毋得㧯自家个伯姆抑係叔姆亂倫，羞辱阿伯抑係阿叔。
15做毋得㧯自家个心舅亂倫，姖係若孻仔个𡜵娘。
16做毋得㧯自家个阿嫂抑係老弟心舅亂倫，羞辱若兄弟。
17「識㧯你有性關係該婦人家，你做毋得㧯厥妹仔、孫女抑係外孫女有性關係；姖等係厥骨肉之親，恁樣做係盡積惡。
18「若𡜵娘還在，做毋得討厥姊妹㧯姖做對頭，羞辱姖。
19「做毋得㧯經期內个女人有性關係，因為姖係無淨浰个。
20「做毋得㧯別人个𡜵娘私通，羞辱你自家。
21「做毋得將自家个子女準做祭物燒獻給邪神摩洛，因為恁樣係侮辱你个上帝。𠊎係上主。
22「男人做毋得㧯男人有性關係，像㧯女人有性關係一樣；這係積惡个事。
23「無論男女全部做毋得㧯獸類有性關係；因為這係違背天性个行為，係羞辱自家。
24「你等做毋得犯以上所列个所有行為來羞辱自家，因為𠊎愛對你等面前逐走个該兜外族人，就係因為做這兜事來羞辱自家。
25佢等个敗壞打垃圾該土地，所以𠊎責罰該土地，使土地呸出它个住民。
26佢等做這一切積惡个事，打垃圾土地，
27總係你等做毋得犯共樣个罪。你等無論係以色列人抑係暫住个旅客，一定愛遵行𠊎个法律㧯命令，
28免得你等打垃圾該土地，該地就將你等呸出去，像呸出在你等以前个各民族一樣。
29「無論麼人做這兜積惡个事，麼人就愛對自家个子民中除名。
30你等愛順從𠊎所宣佈个命令；做毋得學在你等以前住个人个壞風俗，免得你等做積惡个事來羞辱自家。𠊎係上主 — 你等个上帝。」
Who We AreWhat We EelieveWhat We Do
2025 by iamachristian.org,Inc All rights reserved.
