1這兜事以後，上帝愛考驗亞伯拉罕。上帝喊佢：「亞伯拉罕！」佢應：「𠊎在這位！」
2上帝講：「你愛帶若孻仔，就係你所惜个單丁子以撒，到摩利亞去，在𠊎指示你个山頂，將佢做燒化祭獻給𠊎。」
3第二日打早，亞伯拉罕剖好獻祭用个柴，放在驢背頂，帶等兩個僕人㧯厥孻仔以撒，共下去上帝指示个地方。
4到第三日，亞伯拉罕昂頭遠遠就看到該地方。
5佢對僕人講：「你等㧯驢仔留在這位；𠊎㧯細人仔到該片敬拜，然後𠊎等正倒轉來這位。」
6 亞伯拉罕將獻祭用个柴放在厥孻仔以撒个肩頭頂，自家手拿等火種㧯刀仔；兩子爺共下向前行。
7以撒喊一聲：「阿爸！」
亞伯拉罕應講：「孻仔，做麼介？」
以撒問講：「火種㧯柴全部有了，獻祭个羊仔在㖠？」
8 亞伯拉罕應講：「孻仔，獻祭个細羊仔，上帝自家會準備好。」兩儕又繼續向前行。
9佢等到上帝指示个地方，亞伯拉罕開始起祭壇，堆柴在頂高，將自家个孻仔以撒捆起來，放在祭壇个柴頂。
10然後，亞伯拉罕伸手，擎起刀仔，愛㓾厥孻仔。
11該時，上主个天使對天頂喊佢：「亞伯拉罕！亞伯拉罕！」
佢應講：「𠊎在這位！」
12天使講：「毋好㓾這細人仔；連一些仔也做毋得傷害佢！這下𠊎確實知你係敬畏上帝个；因為你無將自家个孻仔，就係你个單丁子，留等毋給𠊎。」
13 亞伯拉罕四面看一下，看到一隻羊牯，兩隻角被細樹枝纏等。佢行過去將羊牯拉出來，用牠代厥孻仔做燒化祭。
14所以，亞伯拉罕㧯該地方安到耶和華以勒
；直到今晡日大家還講：「在上主个山頂，佢會預備 。」15上主个天使第二擺對天頂喊亞伯拉罕講：
16「上主講：『你既然做這件事，無將你个單丁子留下來毋給𠊎，所以𠊎指等𠊎自家个名發誓，
17𠊎一定會賜福給你，愛給你盡多子孫，像天頂个星仔、海邊个沙恁多；你个後代會征服敵人。
18地上萬國會因為你个後代得到福氣，因為你聽從𠊎个命令。』」
19亞伯拉罕轉到厥僕人該位，佢等就共下去別是巴，就係亞伯拉罕住个地方。
拿鶴个後代20後來，有人㧯亞伯拉罕講：「密迦㧯若老弟拿鶴𫱔八個孻仔：
21長子烏斯、厥老弟布斯、基母利 (亞蘭个阿爸)，
22還有基薛、哈瑣、必達、益拉㧯彼土利 (麗百加个阿爸)。」
23密迦㧯亞伯拉罕个老弟拿鶴𫱔這八個孻仔。
24拿鶴个細姐流瑪𫱔提八、迦含、他轄㧯瑪迦。
Who We AreWhat We EelieveWhat We Do
2025 by iamachristian.org,Inc All rights reserved.
