1上主命令摩西
2愛將以下个指示㧯以色列人講。無論男女，若係許願愛做離俗人 ，將自家獻給上主，
3就愛禁止啉淡酒抑係釅酒。佢也做毋得啉葡萄做个飲料，做毋得食葡萄抑係葡萄乾。
4做離俗人个期間，做毋得食葡萄樹所結个東西，連葡萄子、葡萄皮也做毋得食。
5在佢許願做離俗人个期間，佢做毋得剃頭。佢獻給上主、分別為聖个期間，頭那毛由在它長。
6-7佢个頭那毛係奉獻自家給上帝个記號。佢做毋得行近屍體，使自家無淨浰，就算係佢个阿爸、阿姆、兄弟、抑係姊妹，佢也做毋得行前。
8在佢做離俗人期間，佢係分別為聖歸給上主个。
9若係離俗人身邊个人忽然死掉，打垃圾佢分別為聖个頭那毛，佢愛等七日，然後剃頭。恁樣，佢在禮儀上就淨浰了。
10第八日，佢愛帶兩隻月鴿仔抑係兩隻班鳩，到聖帳篷門口，交給祭司。
11祭司愛獻一隻做贖罪祭，一隻做燒化祭，為佢行贖罪禮，因為佢憑到屍體。該日，佢愛重新將頭那毛分別為聖，
12再一擺將自家獻給上主，做離俗人；以前該站日仔就無算，因為佢該分別為聖个頭那毛變做無淨浰。佢愛牽一隻一歲大个細羊牯做贖過失祭。
13到離俗人許願个日期滿，愛行以下个禮儀。佢愛到聖帳篷門口，
14將無缺點个頭牲獻給上主：一隻一歲大个細羊牯做燒化祭，一隻一歲大个羊牸仔做贖罪祭，一隻綿羊牯做平安祭。
15佢也愛獻一籃無酵餅：有幼麵粉攪橄欖油做个賁餅㧯頂高膏橄欖油个薄餅，又愛獻素祭㧯祭酒。
16祭司愛將這兜東西奉獻給上主，為該人獻贖罪祭㧯燒化祭。
17佢愛將該隻綿羊牯做平安祭獻給上主，同時獻該籃無酵餅，也愛獻素祭㧯祭酒。
18離俗人愛在聖帳篷門口剃頭那毛，將頭那毛放在獻平安祭个火頂高燒掉。
19然後，祭司愛將煮好个綿羊牯个一支前腿㧯籃仔肚个一垤無酵賁餅、一垤無酵薄餅放在離俗人个手中。
20接等，祭司愛將這兜搖幾下做搖祭獻給上主；這兜係歸給祭司个聖物。法律所規定个胸脯肉㧯後腿也係歸給祭司个。這以後，離俗人就做得啉酒。
21以上係離俗人應該遵守个條例。若係離俗人在所許个願以外講過愛獻別个祭給上主，就一定愛照所講過个去做。
祭司个祝福22上主命令摩西，
23愛吩咐亞倫㧯佢該兜孻仔用以下个話祝福以色列人：
24願上主賜福給你，保護你；
25願上主用慈愛款待你 ，施恩給你；
26願上主看顧你，賞賜你平安。
27上主講：「若係佢等奉𠊎个名祝福以色列人，𠊎就賜福給佢等。」
Who We AreWhat We EelieveWhat We Do
2025 by iamachristian.org,Inc All rights reserved.
