1上主在西奈山對摩西講話，
2吩咐佢對以色列人宣佈以下个條例：「你等進入𠊎 — 上主賜給你等个土地以後，逐擺堵到第七年愛休耕，表示對上主个尊敬。
3六年內，你等愛耕田，也愛修剪葡萄園，收藏土產。
4總係第七年愛俾土地完全歇睏；這年係獻給上主个。你等做毋得耕種田園，也做毋得修剪葡萄園。
5連田肚自然生个五榖做毋得收割；園肚無修剪也打个葡萄共樣做毋得摘。這年，土地愛完全休耕。
6這一年，土地雖然休耕，還係會有出產好給你等㧯你等个奴僕、奴婢、雇工、並暫時住在你等當中个旅客來食；
7這兜出產，連你等个頭牲㧯田野个走獸也會有好食。土地自然出產个，你等全部做得食。
禧年8「你等愛計算七個安息年，就係七個七年，一共四十九年。
9該年七月初十，就係贖罪日，你等愛派人到全國各地歕羊角。
10你等愛用恁樣來將第五十年分別出來，向全部人民宣佈這年係自由年。這年愛成做你等个禧年；所有買賣个產業愛還給原主抑係原主个後代；賣給人做奴僕个，全部愛放佢等轉自家个屋下。
11第五十年愛成做你等个禧年。你等做毋得耕種，做毋得收割田肚自然生个五榖，也做毋得摘園肚無修剪也打个葡萄。
12這年係禧年，係你等个聖年；你等正做得食土地自然出產个土產。
13「這禧年，所有買賣个財產愛還給原主。
14所以，你等㧯以色列同胞買賣土地个時，愛公當。
15土地个價錢愛根據對買賣个時到下一擺禧年當中土地做得收成个年數來決定；
16年數多，價錢就高，年數少，價錢就低；因為這係照有幾多擺做得收成來賣个。
17你等做毋得梟以色列同胞；愛敬畏你等个上帝，因為𠊎係上主 — 你等个上帝。
安息年个問題18「你等愛實行𠊎个法律，愛遵守𠊎个誡命，好俾你等在這土地安居樂業。
19土地會出產五榖，罅你等食；你等會安居樂業。
20「你等當中可能有人會問：第七年休耕，無收成，愛食麼介呢？
21𠊎 — 上主愛賜福給你等，使土地在第六年出產罅三年食个糧食。
22第八年，你等愛耕種，總係你等還係愛食存糧，直到第九年收成个時。
贖轉屋地產个條例23「你等做毋得將土地永久賣斷，因為土地係𠊎个；你等係像暫住个旅客，做得使用土地定定。
24買賣土地个時，你等一定愛承認原主有贖轉土地个權利。
25「若係你有同胞因為當苦，高不將賣掉土地，後來佢个至親應該將這土地贖轉來。
26該無親戚好將土地贖轉去个人，後來可能經濟好轉，有罅錢好將土地贖轉去，
27在這種情形下，佢一定愛算使用个年數，將贖轉个時到下一擺禧年這站還賸个年數照價值還給買主，恁樣佢就做得贖轉佢承接个土地。
28佢若係無罅錢買轉土地，土地還係歸買主使用到下一擺禧年。到該年，土地就愛歸還原主。
29「若有人將城肚个屋仔賣掉，佢有權在一年內將屋仔贖轉來。
30若係佢在該年內無贖轉，佢就失掉贖轉个權利，屋仔愛歸買主㧯佢个後代做永久个產業；在禧年，屋仔也毋使歸還原主。
31總係，在城外个屋仔愛照鄉下田地个條例處理，原主有權贖轉去；到禧年，屋仔愛歸還原主。
32總係利未人做得隨時贖轉在利未城底背个屋仔。
33利未人若係賣掉利未城肚个屋仔又無贖轉去，到禧年，屋仔愛歸還佢；因為利未人在利未城肚个屋仔係佢等在以色列人中永久个產業。
34總係利未城周圍个牧場做毋得賣；該係佢等永久个產業。
借錢給窮苦人个條例35「若係你有同胞苦到無法度維持生活，你一定愛照顧佢，就像照顧外族人㧯暫住个旅客恁樣，俾佢繼續住在你該位。
36你做毋得拿佢个利息；愛敬畏你个上帝，俾你个同胞繼續住在你該位。
37你借錢給佢，做毋得拿利息，借糧食給佢，也做毋得愛佢還較多。
38𠊎係上主 — 你等个上帝，𠊎識𢱋你等出埃及，愛將迦南地賜給你等，也愛做你等个上帝。
贖轉奴僕个條例39「若係你有同胞苦到賣身給你做僕人，你做毋得款待佢像奴才。
40愛款待佢像請个工人抑係暫住个旅客共樣，佢愛服事你到禧年。
41到禧年，佢㧯佢个子女全部愛離開你，轉到佢自家个家族，到佢祖先个土地去。
42以色列人係𠊎个僕人。𠊎對埃及將佢等𢱋出來；佢等做毋得再賣給人做奴才。
43你做毋得壞款待佢等，愛敬畏你个上帝。
44你若需要奴僕抑係奴婢，做得去四周圍个國買外國人。
45你等也做得買該兜暫時住在你等當中个旅客个子女㧯佢等在你等土地上出世个家屬。這兜人做得做你等个產業；
46你等做得將佢等留給子孫做產業，使佢等一生人服事你等个子孫。總係你等做毋得壞款待以色列同胞。
47「若有暫時住在你等當中个旅客經濟越來越好，總係以色列同胞緊來緊苦，最後卻將自家賣給該暫住个旅客抑係佢个家族，
48賣身以後，佢還有權利好贖身。佢个兄弟、
49叔伯、堂兄弟，抑係其他宗親全部做得為佢贖身。若係佢有罅錢，也做得將自家贖轉來。
50佢愛㧯佢个買主約定贖價。佢等愛對佢賣身做奴僕該年算起，算到禧年，愛照請工人逐年个工錢約定贖價，
51-52佢一定愛照還賸幾多年來算、來納贖價。
53買主愛款待佢像做長年个工人恁樣，做毋得壞款待佢。
54若係佢無辦法照這兜方法被人贖轉來，到禧年，佢㧯佢个子女全部愛得到釋放，恢復自由。
55因為以色列人係𠊎个僕人；𠊎𢱋佢等出埃及。𠊎係上主 — 你等个上帝。」
Who We AreWhat We EelieveWhat We Do
2025 by iamachristian.org,Inc All rights reserved.
