1列國做麼介妄想反叛？
萬民做麼介空空計謀？
2世上个王䟘起來準備，
掌權个官同心計謀，
想愛攻擊上主㧯佢所選立个王。
3佢等講：「𠊎等來掣斷佢等个鎖鍊！
𠊎等來推翻佢等个統治！」
4該坐在天頂寶座个卻好笑；
上主笑佢等个計謀係妄想。
5該時，佢發譴來警告佢等，
佢个大發譴使佢等盡著驚。
6佢講：「在錫安
𠊎个聖山頂，𠊎已經設立屬𠊎个君王。」
7該君王講：「𠊎愛宣佈上主个命令。
上主㧯𠊎講：『你係𠊎个孻仔；
今晡日開始，𠊎做你个阿爸。
8你求，𠊎就將列國賜給你做領土，
將全世界交給你做田產。
9你愛用鐵恁硬个手腕統治佢等；
你愛打爛佢等，像打爛缶仔一樣。』」
10這下，你等做王个啊，愛細膩噢！
在世間掌權个啊，愛聽警告！
11愛用敬畏个心服事上主！
愛驚鹿鹿仔，也盡歡喜！
12愛服事佢个孻仔 ；
若係無，上主會大發譴，
你等就會忽然滅亡；
因為佢个怒氣會即時臨到！
總係，求佢保佑个人全部有福氣！
Who We AreWhat We EelieveWhat We Do
2025 by iamachristian.org,Inc All rights reserved.
