列王紀下 15 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

猶大王烏西雅(歷代志下 26:1-23)

1 以色列王耶羅波安二世在位第二十七年，亞瑪謝个孻仔烏西雅

做猶大王。

2該時烏西雅十六歲；佢在耶路撒冷統治五十二年。厥姆安到耶可利雅，係耶路撒冷人。

3烏西雅學厥爸亞瑪謝个模樣，行上主看做著个事；

4總係佢無除掉山岡頂个神廟，人民還係在該位獻祭燒香。

5上主降災難給烏西雅王，使佢發癩，直到佢過身。佢就住在隔離个王宮肚，厥孻仔約坦掌管國家，治理人民。

6 烏西雅其他个事全部記在《猶大列王史》底背。

7烏西雅死掉，葬在大衛城个王室墳墓肚；佢个孻仔約坦承接佢做王。

以色列王撒迦利雅

8 猶大王烏西雅在位第三十八年，耶羅波安二世个孻仔撒迦利雅做以色列王；佢在撒馬利亞統治六個月。

9佢㧯厥祖先共樣行上主看做邪惡个事，學尼八个孻仔耶羅波安王个壞模樣，害以色列人犯罪。

10雅比个孻仔沙龍造反，在以伯蓮

將撒迦利雅㓾死，搶佢个王位。

11 撒迦利雅其他个事全部記在《以色列列王史》底背。

12上主識向耶戶王講：「你个後代一定會承接你做以色列个王，到第四代 。」恁樣，這應許已經實現了。

以色列王沙龍

13 猶大王烏西雅在位第三十九年，雅比个孻仔沙龍做以色列王；佢在撒馬利亞統治一個月。

14 迦底个孻仔米拿現對得撒去撒馬利亞，將沙龍㓾死，搶佢个王位。

15沙龍其他个事，包含佢造反个故事，全部記在《以色列列王史》底背。

16米拿現對得撒來个時，攻打提斐薩㧯四周圍个地區，㓾掉全城个人民，因為佢等無開城門投降。佢也將全部有身項婦人家个肚笥剖開來。

以色列王米拿現

17 猶大王烏西雅在位第三十九年，迦底个孻仔米拿現做以色列王；佢在撒馬利亞統治十年。

18佢行上主看做邪惡个事，學尼八个孻仔耶羅波安王个壞模樣，一生人害以色列人犯罪。

19亞述皇帝提革拉‧比列色

侵略以色列；米拿現就給佢三百萬隻銀幣，因為愛得到佢个支持，來堅固自家个王位。

20米拿現這兜錢係對以色列个有錢人該位強討來个；佢強迫逐儕拿出五十隻銀幣。亞述皇帝得到這兜錢以後，就轉自家國家去了。

21 米拿現其他个事全部記在《以色列列王史》底背。

22米拿現死掉；佢个孻仔比加轄承接佢做王。

以色列王比加轄

23 猶大王烏西雅在位第五十年，米拿現个孻仔比加轄做以色列王；佢在撒馬利亞統治兩年。

24佢行上主看做邪惡个事，學尼八个孻仔耶羅波安王个壞模樣，害以色列人犯罪。

25比加轄个一個將軍，利瑪利个孻仔比加，帶等亞珥歌伯、亞利耶、㧯 對基列來个五十儕造反，在撒馬利亞王宮內院㓾死比加轄，搶佢个王位。

26 比加轄其他个事全部記在《以色列列王史》底背。

以色列王比加

27 猶大王烏西雅在位第五十二年，利瑪利个孻仔比加做以色列王；佢在撒馬利亞統治二十年。

28佢行上主看做邪惡个事，學尼八个孻仔耶羅波安王个壞模樣，害以色列人犯罪。

29 比加做以色列王个期間，亞述皇帝提革拉‧比列色來佔領以雲、亞伯‧伯‧瑪迦、阿挪、基低斯㧯夏瑣這兜城，還有基列、加利利㧯拿弗他利這兜地區，又將人民捉到亞述去。

30 猶大王烏西雅个孻仔約坦在位个第二十年，以拉个孻仔何細亞反利瑪利个孻仔比加，㓾死佢，搶佢个王位。

31比加其他个事全部記在《以色列列王史》底背。

猶大王約坦(歷代志下 27:1-9)

32 利瑪利个孻仔比加做以色列王第二年，烏西雅个孻仔約坦做猶大王。

33該時約坦二十五歲；佢在耶路撒冷統治十六年。厥姆安到耶露莎，係撒督个妹仔。

34約坦學厥爸烏西雅个模樣，行上主看做著个事。

35總係佢無除掉山岡頂个神廟，人民還係在該位獻祭燒香。約坦又起上主个聖殿北片个門。

36 約坦其他个事全部記在《猶大列王史》底背。

37佢做王个期間，上主派敘利亞王利汛㧯以色列王比加攻打猶大。

38約坦死掉，葬在厥祖先大衛城个王室墳墓肚；佢个孻仔亞哈斯承接佢做王。