1 音麥个孻仔，總管聖殿个祭司巴施戶珥一聽到耶利米宣佈這兜話，
2就打先知耶利米，在聖殿北片个便雅憫門內用枷將佢鎖等。
3第二朝晨，巴施戶珥放佢出來。耶利米就對佢講：「上主並無將你安到巴施戶珥。佢給你个名係『四圍得人驚』。
4因為上主恁樣講：『𠊎愛使你自家㧯你个朋友全部因為你驚到無葛無煞；你會親目看到佢等死在敵人个刀劍下。𠊎會將所有个猶大人交給巴比倫王統治；佢會將佢等捉到巴比倫去，抑係㓾死佢等。
5𠊎愛俾敵人搶劫城肚个財富，將城肚積存个寶物搶走，連猶大王个寶貝也搶走。佢等會將逐項東西搬到巴比倫去。
6論到你，巴施戶珥，你㧯你全家會被人捉到巴比倫去。你會死在該位，葬在該位；時常聽你講假預言該兜朋友也會㧯你堵到共樣个結局。』」
耶利米怪怨上主7上主啊，你㩢耍𠊎；𠊎被你㩢耍到。
你比𠊎較強，你贏過𠊎。
逐儕全部㩢衰𠊎；
佢等歸日將𠊎當做笑科。
8𠊎逐擺開嘴，定著愛大聲喊，
大聲講：暴力！毀滅！
上主啊，𠊎宣佈你个信息，
總係惹來嘲謔、藐視。
9𠊎若講：「𠊎無愛再提起上主，
無愛再奉佢个名宣講」，
你个話就會像火在𠊎心肚燒，
鑽入𠊎个骨頭。
𠊎樣般都忍毋住；
𠊎高不將講出來。
10𠊎聽到盡多人細聲講：
「四圍得人驚」个來了；
𠊎等來告佢！
連知己个朋友也全部等等看𠊎澇潰。
佢等講：「無一定佢會被人落到！
𠊎等就有可能贏過佢，向佢報仇。」
11總係上主啊，你㧯𠊎共下；
你大有能力，非常得人畏。
壓迫𠊎个人全部會失敗；
佢等个陰謀會澇潰。
佢等會非常見笑，因為佢等失敗了；
人永遠毋會毋記得佢等个羞辱。
12上主 — 萬軍个元帥啊，你个裁決公當；
你看穿人个心腸。
求你俾𠊎看到你報復𠊎个敵人，
因為𠊎將𠊎个案件交給你。
13愛唱歌頌讚上主！
愛讚美上主！
佢救窮苦人个命脫離壞人个手。
14願𠊎个生日受咒詛！
願𠊎出母胎該日無受祝福！
15願該向吾爸報消息个人受咒詛！
佢對吾爸報好消息講：
「恭喜你𫱔孻仔！」
16願該人像被上主毀滅个城 ，
得毋到上主个憐憫。
願佢朝晨頭聽到盡嘶个聲，
當晝頭聽到戰爭个嘶聲；
17因為上主 無使𠊎死在母胎，
無俾母胎成做𠊎个墳墓，
吾姆个肚笥就一直擐等𠊎。
18𠊎做麼介愛出世呢？
敢係為到經驗勞苦、憂傷，
在見笑中結束𠊎一生个年日嗎？
Who We AreWhat We EelieveWhat We Do
2025 by iamachristian.org,Inc All rights reserved.
