希伯來書 3 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

耶穌超越摩西

1上帝所選召、所聖別个眾兄弟姊妹啊！你等愛好好愐想耶穌；佢係上帝所差派个，係𠊎等信仰所告白个大祭司。

2佢對選召佢來工作个上帝盡忠心，像摩西在上帝个全家盡忠工作一樣。

3總係，耶穌有資格比摩西承受更大个榮光；就像起屋个人所得个榮光超過佢所起个屋一樣。

4逐間屋係人起造个，總係創造萬有个係上帝。

5摩西在上帝个全家做忠心个僕人，為到上帝後來所愛講个話做證；

6總係，基督用孻仔个身份忠心治理上帝个家。𠊎等若因為所盼望个，勇敢到底，確信到底，𠊎等就係上帝个一家人了。

上帝子民个安息

7所以，像聖靈所講个：

今晡日，你等若聽到上帝个聲，

8就毋好恁硬頸，

像頭擺恁樣悖逆上帝，

像當時在曠野試探佢。

9上帝講：四十年个當中，

你等个祖先雖然看到𠊎所行个，

佢等還係在該位惹𠊎、試探𠊎。

10所以，𠊎對該時代个人發譴，講：

「佢等一直恁毋忠心，

又毋服從𠊎个命令。」

11𠊎在怒氣中發誓：

「佢等絕對做毋得入去該地方享受𠊎所賜个安息！」

12𠊎个兄弟姊妹啊，你等愛細膩噢！驚怕你等當中有人心思敗壞，毋肯相信，離開永生个上帝。

13最好，趕還有所謂「今晡日」个時節，你等愛日日彼此勸勉，免得你等中間有人被罪迷惑，變做硬頸。

14因為，𠊎等若堅持當初个確信，始終不變，𠊎等就係基督个同工。

15照聖經所講个：

今晡日，你等若聽到上帝个聲，

就毋好恁硬頸，

像頭擺恁樣悖逆上帝。

16係麼人聽到上帝个聲又悖逆佢呢？敢毋係摩西對埃及帶領出來个人民嗎？

17該四十年个當中，上帝係對麼人發譴啊？敢毋係該兜因為犯罪、身屍橫在曠野个人嗎？

18上帝發誓講：「佢等絕對做毋得入去該地方享受𠊎所賜个安息！」這句話係對麼人講个啊？敢毋係對該兜悖逆个人嗎？

19對恁樣來看，佢等無法度入去該地方享受安息係因為佢等毋信。