1上主命令摩西，
2吩咐佢向以色列人民宣佈：若係有人無意中犯罪，違反上主个禁令，佢一定愛遵守以下个條例。
3若係大祭司自家犯罪，連累人民，佢一定愛為自家个罪獻一隻無缺點个細牛牯給上主，來做贖罪祭。
4佢愛牽牛牯到上主个聖帳篷門口，將手放在牛牯个頭那頂，在上主面前將牠㓾死。
5然後，大祭司愛拿兜牛牯个血，帶到聖帳篷底背，
6用手指搵血，對等聖所个帳幔拂七擺，
7又愛拿兜血膏在聖帳篷底背、上主面前个香壇个四隻角。佢愛將牛牯賸到个血倒在聖帳篷門口燒化祭个祭壇腳該位。
8佢愛將這隻贖罪祭个牛牯所有个油，就係包等腹內㧯腹內面頂个油、
9兩個腰仔㧯腰仔面頂个油，並肝面頂个網油割下來，
10就像平安祭該牛个油割下來一樣。祭司愛將這兜放在獻燒化祭个祭壇頂高來燒。
11總係佢愛將牛牯个皮、所有个肉、頭、腿、腹內 — 包含腸仔，
12就係歸隻牛牯，帶到營外禮儀上認定淨浰个地方，就係倒灰个地方，放在柴火頂來燒。
13若係以色列全會眾無意中犯罪，違反上主个禁令，雖然全會眾無看出來，
14佢等一發現有罪，會眾就愛獻一隻細牛牯做贖罪祭。佢等愛牽牛牯到聖帳篷前；
15會眾當中該兜長老愛在上主面前將手放在該牛牯个頭那頂，在上主面前將牠㓾死。
16大祭司愛拿兜牛牯个血，帶到聖帳篷底背，
17用手指搵血，在上主面前對等聖所个帳幔拂七擺，
18又愛拿兜血膏在聖帳篷底背、上主面前香壇个四隻角。佢愛將賸到个血倒在聖帳篷門口燒化祭个祭壇腳該位。
19佢愛將牛牯所有个油割下來，放在祭壇頂來燒。
20佢愛照處理贖罪祭个牛牯个方法處理這隻牛牯。祭司愛照這方法為全會眾獻贖罪祭，佢等就得到赦免。
21然後，佢愛將牛牯帶到營外用火燒，就像佢燒該為自家个罪獻个牛牯。這係為全會眾獻个贖罪祭。
22若係官長無意中犯罪，違反上主 — 佢个上帝个禁令，
23佢一發現有罪，就愛獻一隻無缺點个山羊牯做牲儀。
24佢愛將手放在該隻羊个頭那頂，在上主面前、祭壇北片㓾燒化祭頭牲个地方將牠㓾死。這係贖罪祭。
25祭司愛用手指搵這牲儀个血，膏在燒化祭个祭壇个四隻角，將賸到个血倒在祭壇腳該位。
26佢又愛將該山羊牯所有个油放在祭壇頂來燒，就像佢燒平安祭牲儀个油恁樣。祭司愛照這方法為官長个罪獻贖罪祭，佢就得到赦免。
27若係人民中有人無意中犯罪，違反上主个禁令，
28佢一發現有罪，就愛獻一隻無缺點个山羊乸做牲儀。
29佢愛將手放在該頭牲个頭那頂，在祭壇北片㓾燒化祭頭牲个地方將牠㓾死，做贖罪祭。
30祭司愛用手指搵這牲儀个血，膏在燒化祭个祭壇个四隻角，將賸到个血倒在祭壇腳該位。
31該人愛將該山羊乸所有个油割下來，就像人將平安祭牲儀个油割下來恁樣。祭司愛將所有个油放在祭壇頂來燒，做清香个牲儀獻給上主。祭司愛用這方法為該人獻贖罪祭，佢就得到赦免。
32若係佢獻綿羊做贖罪祭个牲儀，一定愛獻無缺點个綿羊乸。
33佢愛將手放在該贖罪祭个頭牲个頭那頂，在祭壇北片㓾燒化祭頭牲个地方將牠㓾死，做贖罪祭。
34祭司愛用手指搵這牲儀个血，膏在燒化祭个祭壇个四隻角，將賸到个血倒在祭壇腳該位。
35該人愛將該綿羊乸所有个油割下來，就像人將平安祭个綿羊个油割下來恁樣。祭司愛將所有个油放在祭壇頂，㧯獻給上主个火祭共下燒。祭司愛用這方法為該人个罪獻贖罪祭，佢就得到赦免。
Who We AreWhat We EelieveWhat We Do
2025 by iamachristian.org,Inc All rights reserved.
