以西結書 41 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1接等，該人帶𠊎到聖所。佢量聖所个門口，深三公尺 ，

2闊五公尺，兩片壁个柱𣎴共樣賁兩公尺半。佢又量聖所，長二十公尺，闊十公尺。

3然後，佢到內殿去。佢量內殿个門口，深一公尺，闊三公尺，兩片壁个柱𣎴共樣賁三公尺半。

4佢又量內殿，係十公尺四方。佢㧯𠊎講：「這係至聖所。」

聖殿个橫屋

5該人量聖殿个壁，賁三公尺。聖殿周圍个壁外向有橫屋，逐間闊兩公尺。

6橫屋有三層，逐層有三十隻間房。聖殿个壁外向个逐層全部比下一層跔兜落去，上一層就比下一層較薄兜仔，所以橫屋个樑榫做得放在下一層較闊个壁頂高，毋使用釘仔固定。

7恁樣，對外背看聖殿个壁，對頂高到下背，當像全部平賁。憑等聖殿外壁㧯這兜橫屋外片有兩個闊闊个樓梯，人做得對一樓上到二樓，再到三樓。

8-11這兜橫屋外向个壁賁兩公尺半。聖殿个北片有一隻門做得通到橫屋，南片也有一隻門通到橫屋。𠊎看到聖殿周圍有兩公尺半闊个騎樓；這騎樓離地面三公尺，㧯憑等聖殿外向壁頂高該兜房間个地基平高。在聖殿三面个騎樓㧯祭司用个房間之間有空地，闊十公尺。

西片个房屋

12聖殿西片空地个盡尾有一座屋，長四十五公尺，闊三十五公尺，四周圍个壁賁兩公尺半。

聖殿个尺寸

13該人量聖殿，長五十公尺。對聖殿後壁到空地盡尾西片該座屋个後壁，有五十公尺。

14聖殿个頭前㧯兩片个空地長也係五十公尺。

15佢又量西片該座屋，包含兩片个走廊，也係五十公尺。

聖殿个內部

16聖殿个前堂、聖所、㧯至聖所，對地面到窗門口个壁全部鑲樹枋。這兜窗門做得關起來 。

17聖殿四周圍个壁，對地面到門个頂高 ，

18內外全部雕刻基路伯㧯棕樹。基路伯㧯棕樹一隻隔一隻排等。逐隻基路伯全部有兩隻面：

19-20像人个面向等這片个棕樹，像獅仔个面向等該片个棕樹。壁个四圍，對地面到門个頂高全部係恁樣。

21聖所个門柱係四方个。

樹料做个祭壇

22在至聖所个門口頭前有一隻樹料做个祭壇，高一公尺半，闊一公尺。祭壇四角个柱仔、壇面，㧯壇堘全部係樹料做个。該人㧯𠊎講：「這係擺在上主面前个桌仔。」

門

23聖所㧯至聖所个門口各有兩層門。

24逐層門全部係雙扇个，逐扇門做得自由開闔。

25聖所个門面頂雕刻有棕樹㧯基路伯，像壁項个共樣。前堂門个門楣外向有用枋仔遮等。

26前堂兩片全部有細窗門，壁項有雕刻棕樹 。