耶利米書 34 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

給西底家个信息

1 巴比倫王尼布甲尼撒㧯佢个軍隊，並佢所統治各國逐族个軍隊在圍攻耶路撒冷㧯周圍城鎮个時，上主向耶利米講話。

2上主 — 以色列个上帝吩咐佢去㧯猶大王西底家講：「𠊎 — 上主愛將這城交給巴比倫王；佢愛放火燒城。

3你絕對走毋掉；你會被人捉到，交在巴比倫王手中。你會親目看到佢，佢會面對面㧯你講話，然後你一定會被人帶到巴比倫去。

4「猶大王西底家啊，你還愛聽𠊎 — 上主个話！論到你，𠊎㧯你講：你毋會被人㓾死；

5你會平安過身。人會埋葬你，為你燒香料，像你个祖先，就係該兜在你以前个王，有人埋葬佢等，為佢等燒香料共樣。人會為你唱哀歌講：『唉哉！𠊎等个王啊！』𠊎 — 上主恁樣宣佈了。」

6所以，先知耶利米在耶路撒冷將這兜話㧯猶大王西底家講。

7該時，巴比倫王帶領个軍隊堵好在圍攻耶路撒冷㧯猶大賸到个兩座城 — 拉吉㧯亞西加，因為猶大有設防衛个城只賸到這兩座。

違背釋放奴才个約

8 西底家王識㧯耶路撒冷人民立約，發出『自由个宣言』。

9希伯來奴才，無論男女，全部愛放走，做毋得使任何一個猶大同胞做奴才。

10所有簽約个人民㧯官員全部同意放自家个奴才走，做毋得再管制佢等。這兜人全部有守約，將奴才放走。

11總係後來佢等又變主意，將該兜奴才捉轉來，再強迫佢等做奴才。

12所以，上主又向耶利米講話。

13上主 — 以色列个上帝喊佢㧯人民恁樣講：「𠊎對埃及 — 你等祖先做奴才个所在 — 將佢等搶救出來个時，㧯佢等立約，講：

14『若係有一個希伯來同胞賣給你，服事你六年，第七年你愛俾佢自由出去。』總係你等个祖先毋搭𠊎，毋聽𠊎个話。

15這下，你等已經悔改，做𠊎所歡喜个事，逐儕向同胞宣佈愛俾所有个人自由，又來到𠊎面前，在敬拜𠊎个聖殿肚立約。

16總係你等又改變主意，侮辱𠊎。你等將該兜被人放走、得到自由个奴才捉轉來，再迫佢等做奴才。

17「所以，𠊎 — 上主講：你等無服從𠊎，無照向同胞、鄰舍所宣佈个俾所有个人自由。看啊，𠊎向你等宣佈另外一種个『自由』，𠊎愛由在你等堵到戰爭、發瘟、㧯飢荒來死。𠊎愛使天下萬國看到你等所堵到个來著驚。

18-19猶大㧯耶路撒冷个領袖、宮廷个官員、祭司、並所有這地个眾民，識㧯𠊎立過約；佢等將細牛牯剖做兩析，對中央行過去，表示立約成立。總係佢等破壞𠊎个約，無遵守這約个規定，所以𠊎愛將佢等剖開，像佢等剖開細牛牯一樣。

20𠊎愛將佢等交給想愛㓾佢等个敵人手中；佢等个身屍會成做飛鳥㧯走獸个食物。

21𠊎愛將猶大王西底家㧯佢个官員全部交給想愛㓾佢等个敵人手中；𠊎愛將佢等交給這下暫時撤退个巴比倫王軍隊手中。

22𠊎愛下令巴比倫軍隊開轉來這城。佢等會攻擊，佔領，燒掉這城。𠊎愛使猶大逐座城市全部荒廢，無人住。𠊎 — 上主恁樣宣佈了。」