1耶穌看到一大群人，就上山，坐下來；厥學生圍在佢个旁邊。
2佢就教訓佢等，講：
論福氣(路加 6:20-23)3「承認自家靈性窮苦个人實在有福氣；
佢等係天國个子民！
4「為到罪來悲傷个人實在有福氣；
上帝愛安慰佢等！
5「謙卑个人實在有福氣；
佢等會得到上帝應許个土地！
6「饑渴欣慕上帝旨意个人實在有福氣；
上帝愛使佢等得到滿足！
7「用慈悲款待人个實在有福氣；
上帝也愛用慈悲款待佢等！
8「內心純潔个人實在有福氣；
佢等會看到上帝！
9「為到和平盡心盡力个人實在有福氣；
上帝愛稱佢等做子女！
10「因為實行上帝个旨意來受迫害个人實在有福氣；
佢等就係天國个子民！
11「因為你等跈𠊎，別人就侮辱你等，迫害你等，講各樣壞話譭謗你等，你等實在有福氣噢！
12應當愛歡喜快樂，因為在天頂有為你等準備豐富个獎賞；頭擺个先知也係恁樣被人迫害。
鹽㧯光(馬可 4:21；9:50；路加 14:34-35)13「你等係人間个鹽；總係鹽若失掉鹹味，愛樣般使它再鹹呢？既然成做廢物，只有㧒掉，由在人踐踏。
14「你等係世間个光。起在山頂个城係無法度遮起來个。
15無人點燈放在斗底下，一定係放在燈臺頂，正會照光全家个人。
16共樣，你等个光也應該照在人个面前，俾佢等看到你等个好行為，來頌讚你等在天頂个阿爸。
論法律17「莫想𠊎來係愛廢除摩西个法律㧯先知个教訓。𠊎毋係來廢除，係來成全它兜个意義。
18𠊎實在㧯你等講，天地還在，法律个一筆一畫就做毋得廢掉，直到萬事个結尾 。
19所以，就算違犯最細个一條誡命，又教別人也恁樣做个，在天國愛成做最尾个人。遵守法律，又教別人也共樣遵守个，在天國愛成做最大个人。
20所以，𠊎㧯你等講，你等若係無比經學教師㧯法利賽人還較忠心來實行上帝个旨意，一定毋會入天國。
論發譴21「你等識聽講，有禁止古人个話，講：『做毋得㓾人；㓾人个愛受審判。』
22總係𠊎㧯你等講，對兄弟抑係姊妹發譴个 ，也愛受審判；罵兄弟抑係姊妹『廢人』个，就愛上法院；罵兄弟抑係姊妹『大戇番』个，免不了愛受地獄个火燒。
23因為恁樣，你在祭壇前愛獻禮物給上帝个時節，若係想起有兄弟抑係姊妹對你不滿，
24你就愛將禮物留在祭壇前，黏時去同佢講和，然後正倒轉來獻禮物給上帝。
25「若係有人愛告你，拉你上法院，你就愛把扼時間，在吂到法院以前同佢和解。若係無，入去法院以後，佢就會將你交給法官，法官交給法警，關你入監獄。
26𠊎實在㧯你講，你愛坐監，到你納清罰金个最後一分錢。
論姦淫27「你等聽過古時代有恁樣个教訓講：『做毋得犯姦淫。』
28總係𠊎㧯你等講，看到婦女就生出邪念个，在佢个心中已經同姖犯姦淫。
29若係你个右眼害你犯罪，將它挖出來，㧒掉它！損失身體个一部份比歸身落地獄好加盡多。
30若係你个右手害你犯罪，將它斬下來，㧒掉它！損失一個肢體比歸身落地獄好加盡多。
論離掉𡜵娘(馬太 19:9；馬可 10:11-12；路加 16:18)31「又有恁樣个教訓講：『凡係愛離掉𡜵娘个，一定愛寫離婚書給姖。』
32總係𠊎㧯你等講，除了佢个𡜵娘無守貞節，老公就做毋得離掉姖。因為，若係佢个𡜵娘再嫁人，佢就係害佢个𡜵娘犯姦淫；討姖个男人也係算犯姦淫。
論發誓33「你等乜聽過有教訓古人个話，講：『做毋得違背所發个誓；在主个面前所發个誓一定愛實行。』
34總係𠊎㧯你等講，根本做毋得發誓。做毋得對天發誓，因為天係上帝个寶座；
35做毋得指地發誓，因為地係上帝个腳踏；也做毋得對耶路撒冷發誓，因為該係大君王个城；
36連指自家个頭那發誓也做毋得，因為你無辦法使自家个一條頭那毛變烏抑係變白。
37你等講話，係，就講『係』，毋係，就講『毋係』；加講个就係對該邪惡者來个。
論報仇(路加 6:29-30)38「你等聽過這種个教訓講：『目珠賠目珠，牙齒賠牙齒。』
39總係𠊎㧯你等講，做毋得報復欺負你等个人。有人打你嘴角个右片，連左片也俾佢打！
40有人拉你上法院，愛拿你个內衫，連外衫也給佢！
41若係有人強迫你代佢揹東西行一里路，你就為佢加行一里。
42有人對你求麼介，就愛給佢；有人對你借麼介，就愛借給佢。
論惜仇敵(路加 6:27-28，32-36)43「你等又聽過恁樣个教訓講：『惜你个朋友，怨恨你个仇敵。』
44總係𠊎㧯你等講，愛惜你等个仇敵，為迫害你等个人祈禱。
45恁樣，你等正可以做天父个子女。因為天父用日頭照好人，也照壞人；落雨給行善个，也給作惡个。
46若係你等只有惜該兜惜你等个人，上帝樣愛使獎賞你等哪？連稅棍乜恁樣行。
47若係你等只有對朋友請安，有麼介了不起哪？異教徒敢毋係恁樣行？
48你等愛完全，就像你等个天父係完全个一樣。」
Who We AreWhat We EelieveWhat We Do
2025 by iamachristian.org,Inc All rights reserved.
