1「在逐個七年最尾个一年，你等愛免掉人个債。
2這個條例規定：所有借錢給以色列同胞个債主一定愛將同胞个債免掉，做毋得再討，因為這債務得到免掉係上主宣佈个。
3外國人欠个債，你等做得再討；總係對自家个同胞，無論欠你等麼介，全部做毋得再討。
4-5「上主 — 你等个上帝會在佢愛賜給你等个土地上大大賜福給你等。若係你等聽從上主 — 你等个上帝，認真遵行𠊎今晡日給你等所有个命令，你等當中就毋會有窮苦人。
6因為上主 — 你等个上帝愛照佢个應許賜福給你等。你等會有錢借給盡多外國人，也毋使向人借錢。你等會管多多國人，總係無一國會管你等。
7「在上主 — 你等个上帝賜給你等个土地上，無論在㖠個城肚，若係發現有窮苦个同胞，你等做毋得恁硬心、跔手毋幫助佢。
8你等顛倒愛出手大方，將佢所需要个借給佢，來補佢个不足。
9你等愛細膩，做毋得因為第七年 — 安息年會到了，就毋借給窮苦个同胞；你等心肚絕對做毋得有這種壞念頭。若係你等毋借，佢向上主控告，你等就有罪了。
10毋好毋拌得，一定愛大方給佢，上主 — 你等个上帝就會凡事賜福給你等。
11你等住个所在常常會有窮苦人，所以𠊎命令你等，一定愛向窮苦有需要个同胞大大方方伸手幫助佢等。」
對待奴才个條例(出埃及記 21:1-11)12「若係有希伯來同胞，無論男女，賣做你等个奴才，已經服事你等六年，到第七年，你等一定愛放佢，俾佢自由。
13你等放佢个時，毋好俾佢空手離開。
14上主 — 你等个上帝樣般賜福給你等，你等也愛照樣將你等个羊群、五榖㧯酒大方分給佢。
15你等愛記得，你等在埃及做過奴才；上主 — 你等个上帝救贖你等，所以𠊎今晡日正恁樣命令你等。
16「若係你等个奴才因為敬愛你等㧯你等个家庭，無愛離開你等，愛㧯你等共下住下去，
17你等就愛拿鑽仔來將佢个耳公靠在門枋鑽一隻孔。恁樣，佢就一生人做你等个奴才。對待奴婢也用共樣个方法。
18你等放奴才个時，心肝毋好毋甘願；因為佢服事你等六年，只有拿一般工人所得工錢个一半 。你等恁樣做，上主 — 你等个上帝就會凡事賜福給你等。」
頭胎牛羊个條例19「你等愛將頭胎个牛牯、羊牯分別出來，獻給上主 — 你等个上帝；做毋得用這種牛耕種，也毋好剪這種羊个毛。
20逐年，你等㧯你等屋下人愛在上主所選个所在，在上主 — 你等上帝面前，食這種牛羊个肉。
21若係這種牛羊有缺點，像跛腳、瞙目，抑係其他任何缺點，你等就做毋得將牠獻給上主 — 你等个上帝。
22你等做得在屋下食這種有缺點个牛羊个肉。無論在禮儀上係淨浰抑係無淨浰个人，全部做得食，像食野鹿抑係羚羊一樣。
23總係你等做毋得食血，愛將它倒在地上，像倒水一樣。」
Who We AreWhat We EelieveWhat We Do
2025 by iamachristian.org,Inc All rights reserved.
