1上主㧯𠊎講話；佢講：
2「人子啊，你愛為泰爾唱哀歌，
3追悼該企在港口、㧯盡多海島國家做生理个港口。愛㧯泰爾講，至高个上主恁樣講：
泰爾啊，你誇口自家
係十全十美个城市。
4你將大海當做屋下；
你被人起到像係盡靚个船仔。
5佢等用黑門山个松樹做船枋，
用黎巴嫩个香柏樹做船柱。
6佢等用巴珊个橡樹做船槳，
用塞浦路斯
个松樹鑲象牙做船面頂个枋。7你个帆布用上等个繡花麻紗做个，
係埃及出產个，
遠遠看去就當明顯。
你个篷布用最好个布料做个，
係對以利沙島運來个藍色、紫色布。
8為你撐船个係西頓人、亞發人；
為你捍舵个係本地師傅。
9船頂个木匠係迦巴勒來个老手路，
都在你个中間做補船縫个工作；
海上个船㧯船員全部在你个店肚做生理。
10「你个軍隊有波斯、呂底亞㧯弗請來个戰士。佢等將盾牌㧯鐵帽掛在你个營房。佢等為你爭取光榮。
11亞發㧯基利家
來个戰士為你掌城牆；迦瑪底來个戰士代你保護城樓。佢等將盾牌掛在你个牆頭頂。佢等使你十全十美。12「你㧯他施人做生理，用你豐富个財物交換佢等个銀、鐵、錫㧯鉛。
13你㧯希臘人、土巴人、米設人做生理，用你个貨物交換佢等个奴才㧯銅器。
14你㧯陀迦瑪人做生理，用你个貨物交換佢等个馬、戰馬㧯騾仔。
15你㧯羅德人 做生理，用你个貨物交換海滣各地个象牙㧯烏心石个樹料。
16你㧯亞蘭人做生理，用你充足个製品交換佢等个綠寶石、紫色布、繡花布、上等麻紗、珊瑚㧯紅寶石。
17你㧯猶大人並以色列人做生理，用你个貨物交換佢等个大麥 、蜂糖、橄欖油㧯香料。
18你㧯大馬士革人做生理，用你盡多个製品交換佢等黑本出產个酒㧯沙哈出產个羊毛。
19佢等 也用盡好个機器㧯香料交換你个貨物。
20底但人用鋪馬鞍个毯仔交換你个貨物。
21阿拉伯人㧯基達一帶个領袖用細羊仔、綿羊牯、山羊交換你个貨物。
22示巴㧯拉瑪个生理人用珠寶、金㧯高級香料交換你个貨物。
23哈蘭、干尼、伊甸該兜城、示巴个生理人、亞述㧯基抹該兜城全部㧯你做生理。
24佢等將奢華个衫褲、紫色布、繡花布、彩色个地毯、盡靚个帶仔，用索仔捆等賣給你。
25你用他施最大个商船組成船隊裝運貨物。
你像在海上行船个大船，
裝滿貨物。
26撐船个將你撐到外海；
東風在海上攻擊你。
27沈船个時，
所有貴重个貨物，
全部船員㧯捍舵个人，
船頂个木匠㧯生理人，
船頂所有个軍人㧯人民，
全部沈到海底去。
28沈船个時，
船員喊救命个聲
致到在海滣个地皮也會顫。
29所有个船仔全部被人㧒掉；
逐個船員㧯撐船个人全部爬上海滣。
30佢等為你開聲大噭，
委泥粉在頭那頂，
在火灰當中輾來輾去。
31佢等剃光頭，著麻衫；
佢等為你傷心盡噭。
32佢等為你唱這首哀歌：
㖠座城做得㧯泰爾比呢？
㖠隻城做得㧯該沈到海底个泰爾比呢？
33你向海外運送貨物个時，
列國全部得到供應。
你个財富㧯貨物
使地上个君王變好額。
34這下，你堵到海難；
你沈到海底。
你所有个貨物㧯你个眾人
全部㧯你共下沈到海肚去。
35「眾海島个人全部因為你个命運著驚；佢等个君王也全部驚到滿面憂愁。
36你慘了，永遠滅亡了！世間逐所在个生理人全部著驚，驚怕會堵到㧯你共樣个命運。」
Who We AreWhat We EelieveWhat We Do
2025 by iamachristian.org,Inc All rights reserved.
