撒母耳記下 8 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

大衛軍事上个勝利(歷代志上 18:1-13)

1後來，大衛又攻擊非利士人，打贏佢等，結束佢等在這垤土地个統治。

2佢又打贏摩押人。佢喊佢等睡在地上，用一條索仔量佢等，將頭兩擺量到个人㓾死，第三擺量到个人就留佢等个命 。所以摩押人歸順大衛，向佢進貢。

3 大衛又打贏瑣巴王利合个孻仔哈大底謝。當哈大底謝向幼發拉底河地區進軍、愛恢復佢个統治个時，

4大衛捉到佢个騎兵一千七百人，步兵兩萬人。對捉來个馬當中，大衛留下愛拖一百輛戰車罅額个戰馬，將其他戰馬个腳筋全部剁斷。

5 大馬士革个敘利亞人派軍隊去幫助瑣巴王哈大底謝个時，大衛攻打佢等，㓾掉兩萬兩千人。

6然後，大衛派軍隊駐在大馬士革、敘利亞人个國內；佢等全部歸順大衛，向佢進貢。大衛無論去到㖠位，上主使佢逐擺打贏。

7大衛搶到哈大底謝該兜軍官所拿个金盾牌，帶轉耶路撒冷去，

8又對哈大底謝統治个兩隻城市比他㧯比羅他搶到盡多个銅。

9 哈馬王陀以聽講大衛打贏哈大底謝个全軍，

10就派佢个孻仔約蘭去向大衛王請安，祝賀佢得到勝利 (原來陀以㧯哈大底謝時常相㓾)。約蘭帶來金、銀、銅製造个禮物送給大衛，

11-12大衛王將這兜禮物連同佢對其他國家搶來个金銀，就係對佢所征服个以東、摩押、亞捫、非利士、亞瑪力，還有對瑣巴王利合个孻仔哈大底謝該位搶來个攏總分別為聖獻給上主。

13 大衛在鹽谷㓾掉一萬八千以東人，轉來以後就得到當大个名聲。

14佢派軍隊駐在以東个逐地方；該地方个人民全部歸順佢。大衛無論去到㖠位，上主使佢逐擺打贏。

大衛个大臣(歷代志上 18:14-17)

15 大衛統治全以色列，向人民實行公義。

16洗璐雅个孻仔約押做元帥；亞希律个孻仔約沙法做歷史官；

17亞希突个孻仔撒督㧯亞比亞他个孻仔亞希米勒做祭司；西萊雅做王室書記；

18耶何耶大个孻仔比拿雅做大衛个侍衛長、統管基利提人㧯比利提人；大衛該兜孻仔全部做祭司。