何西阿書 4 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

上主責備以色列人

1 以色列人啊，你等愛注意聽上主對這地方人民个責備。佢講：「這位个人無誠實，也無愛心；佢等毋承認𠊎係上帝。

2佢等假發誓、講花撩、兇殺、做賊、行姦淫；佢等一直犯罪，血案連連。

3所以，這地方會做天旱；人民全部會渴死。所有飛禽走獸，甚至水肚个魚類，全部會消滅。」

上主責備祭司

4上主講：「祭司啊，你等毋好責備人民，也毋使控告佢等，因為𠊎愛控告个就係你等 。

5你等个行為企毋正，無分日夜，該兜先知也共樣跌倒。𠊎愛消滅你等个阿姆 — 以色列。

6𠊎个子民愛滅亡，因為佢等毋承認𠊎。你這兜祭司毋承認𠊎，又拒絕𠊎 — 上帝个教訓。所以𠊎愛拒絕你等，毋俾你等个子孫做𠊎个祭司。

7「你等這群祭司，你等人越多就越敢得罪𠊎，所以𠊎愛使你等个光榮變做見笑。

8𠊎个子民犯罪，卻畜肥你等，所以你等愛佢等多多犯罪。

9將來你等一定愛㧯人民共樣受責罰，照你等个所行所做共樣堵到報應。

10你等好食，總係食毋飽；你等行姦淫，總係子孫無較多；因為你等離開𠊎 — 上主，去跈別个神明。」

上主責備拜偶像个罪

11上主講：「新酒㧯老酒害𠊎个子民頭腦無清楚。

12佢等去求問樹頭，聽從樹枝个指示。淫亂个心靈迷惑佢等去行姦淫，遠離佢等个上帝。

13佢等在山頂獻祭，在山岡頂个大樹下燒香，因為佢等在樹影下感覺涼爽。

「所以，你等个妹仔去做妓女；你等个心舅㧯人行姦淫。

14總係，𠊎無責罰姖等，因為你等也㧯神廟个妓女行姦淫，㧯姖等共下向神明獻祭。就像俗語講个：『無智識个人民一定會衰。』

15「雖然你這兜以色列人悖逆𠊎，𠊎希望猶大人毋會犯共樣个罪。你等毋好去吉甲，也毋好上去伯‧亞文

禮拜，毋好在該兜所在指等𠊎 — 永生上主个聖名發誓。

16以色列人㧯牛乸共樣恁硬頸，𠊎樣能牧養佢等，像在草場牧養羊群一樣呢？

17以色列人 被偶像迷到。由在佢等行差路！

18佢等㧯酒醉个人做朋友。佢等繼續過放蕩淫亂个生活，歡喜做見笑个事，卻無歡喜得到尊榮。

19佢等會被淫亂捉去，像被龍捲風捲走；佢等會向該兜神明獻祭致到見笑。」